Перамогу прынеслі “Беларускія найгрышы”
У Паставах адбыўся XXIX міжнародны фестываль народнай музыкі «Звіняць цымбалы і гармонік». У ім прынялі ўдзел аматарскія ансамблі народнай музыкі, інструментальныя групы, фальклорныя інструментальныя калектывы і індывідуальныя выканаўцы на народных музычных інструментах з усіх абласцей Беларусі і пяці замежных краін: Расіі, Латвіі, Літвы, Эстоніі, Індыі. Адначасова Мінскую вобласць і Пухавіцкі раён на фестывал і прадстаўляў удзельнік сямейнага ансамбля «Жывіца» Борскага сельскага Дома культуры Юрый Крывашэй.
— Я выступаў у намінацыі «Індывідуальны выканаўца», — расказаў Юрый. — Выконваў твор Уладзіміра Гінько «Беларускія найгрышы»: іграў на дудзе, жалейцы, дудцы і гармоніку.
Падчас фестывалю праходзіла вялікая колькасць разнастайных цікавых мерапрыемстваў. Было адзначана, што адной з найважнейшых пляцовак музычнага форуму стала творчая лабараторыя «Дуда — покліч часу»: музыказнаўцы сёлета звярнулі асаблівую ўвагу на гэты музычны інструмент, яго магчымасці ва ўзбагачэнні палітры гучання аркестраў. У рабоце творчай лабараторыі прымаў удзел і Юрый Крывашэй, праводзіў майстар-клас ігры на дудзе.
Дадому музыкант вярнуўся з узнагародамі. За папулярызацыю народнага мастацтва, захаванне і развіццё музычных традыцый ён атрымаў спецыяльны дыплом фестывалю «Лаўрэат І ступені» і каштоўны прыз Цэнтральнага камітэта Беларускага прафсаюза работнікаў культуры, інфармацыі, спорту і турызму.
Наталля ПАРХОМЧЫК.