Перавёз больш за ўсіх збожжа ад камбайна ў нашым раёне
Штогод вадзіцель ААТ “Зазерка” Міхаіл Навіцкі — у ліку лідараў сярод удзельнікаў раённага спаборніцтва на жніве. Без малога тры дзесяцігоддзі ён працуе вадзіцелем у гэтай гаспадарцы. Пачынаючы з ранняй вясны і да позняй восені, ён шчыруе на аўтамашыне МАЗ-6501.
Сёлета Міхаіл Васільевіч выконваў розную работу. У перыяд нарыхтоўкі кармоў перавёз 2500 тон зялёнай масы. Прымаў актыўны ўдзел ва ўборачнай кампаніі: перавёз 3309 тон збожжа, 410 тон насення рапсу і 7,7 тоны насення травы.
Трэба адзначыць, што на жніве Міхаіл Навіцкі перавёз больш за ўсіх збожжа ад камбайна ў нашым раёне. Такі працоўны поспех не выпадковы: Міхаіл Васільевіч вельмі добрасумленна і адказна ставіцца да сваёй работы.
Машына, на якой ён працуе, не новая. Вадзіцель беражліва адносіцца да сваёй тэхнікі, а калі здараюцца паломкі, сам займаецца рамонтам.
І ў гэтыя дні Міхаіл Навіцкі заняты на адказным участку: ён адвозіць з поля зялёную масу на сілас. Ужо перавёз больш за 2 тысячы тон.
У сельгасарганізацыі ведаюць Міхаіла Васільевіча як добрага і вельмі адказнага чалавека, які любіць сваю работу і выконвае яе толькі на выдатна.
Анастасія ПЛЯТНЁВА.