Снег прынёс з сабой радасць і клопаты
Многія, не сакрэт, з нецярпеннем чакалі сапраўднага снегу, бо і мінулая зіма нас не паспела парадаваць снежнымі днямі. І вось ён выпаў як падарунак на Каляды. Праўда, як заўсёды, па сваёй уласнай праграме: адразу і многа. І таму пакуль адны любаваліся зімовымі малюнкамі з акна або абкатвалі лыжы ды цюбінгі, другія забыліся на святочныя дні і працавалі ва ўзмоцненым рэжыме.
Метэастанцыя
— За першую дэкаду студзеня выпала колькасць асадкаў 51 міліметр пры норме 11 мілі-метраў, — расказвае начальнік метэастанцыі «Мар’іна Горка» Наталля Шнэк. — Гэта ў пяць разоў перавысіла дэкадную норму. Улічваючы той факт, што ў месяц норма складае 34 міліметры, ужо выпала 150 працэнтаў ападкаў ад месячнай нормы.
Гэта на самай справе нядрэнна. Глеба набярэ неабходную вільгаць, пад мяккай снежнай коўдрай у сярэдзіне зімы аказаліся азімыя культуры. Сярэдняя вышыня снежнага покрыва, дарэчы, склала 24 сантыметры.
Станцыя Пухавічы
— Шмат было збояў пры падачы электраэнергіі на нашым кірунку, — расказаў выконваючы абавязкі начальніка станцыі Пухавічы Васіль Зорын. — Па прычыне таго, што снег адразу ішоў мокры, з’явілася наліпанне на правадах. Акрамя таго, у аператыўным рэжыме мы чысцілі паветранай гарматай стрэлкі ад снегу. У начную змену гэтыя работы выконвалі тры чалавекі, а ў дзённую — цэлая брыгада з 15 чалавек. У такім рэжыме працавалі два дні, калі снег практычна не спыняўся. Пастаянна чысцілі 24 стрэлкі на станцыі Пухавічы і пад’язныя шляхі.
Вялікі снег стаў выпрабаваннем для хуткасных цягнікоў Штадлер. Лёд, што ўтвараўся на ніжняй частцы цягніка, перашкаджаў руху. Цягнікам прыходзілася спыняцца, што ўплывала на расклад.
ДРБУ-169 філіял КУП «Мінскаблдарбуд»
Працавалі ва ўзмоцненым рэжыме ў святочныя дні і дарожныя рабочыя. Была задзейнічана ўся тэхніка: два аўтагрэйдары, два па-грузчыкі, дзевяць трактароў МТЗ і сем пескараскідальнікаў. Першымі вызвалялі ад снегу ўсе транзітныя дарогі з аўтобусным рухам, затым пад’язныя да вёсак дарогі і ўезды ў садовыя таварыствы.
— Адразу мы чысцілі дарогі ад снегу, — зазначыў інжынер па бяспецы руху ДРБУ № 169 філіял КУП «Мінскаблдарбуд» Дзмітрый Апаровіч. — Затым пасыпалі пясчана-салянай сумессю дарогі з асфальтабетонным пакрыццём. У дыспетчарскую службу паступалі званкі ад пухавіччан, але яны насілі хутчэй папераджальны характар. Многія хваляваліся, як будуць дабірацца дадому пасля святаў.
Усе просьбы дарожнікі імкнуліся выканаць у самыя кароткія тэрміны.
Асаблівага аўралу, які мог бы выклікаць снегапад, не назіралася. Да таго ж, не было і моцнага ветру, які спрыяе ўтварэнню сумётаў на дарозе.
Анастасія Плятнева.
Камунальнае прадпрыемства
У тры гадзіны раніцы 8 снежня скончыліся святочныя дні ў многіх работнікаў камунальнага прадпрыемства “Жылцепласэрвіс”. Снег не стаў нечаканасцю, як любяць жартаваць пра такія “падарункі” грамадзяне, аднак цяжкасці ў рабоце выклікаў, бо прыбывае ён без уліку магчымасцяў прадпрыемства і нягледзячы на святы ці час сутак.
Каб справіцца з чысткай больш як 800 кіламетраў дарог, што знаходзяцца на балансе прадпрыемства, прыйшлося вывесці не толькі ўласную тэхніку (19 адзінак), але і прыцягнуць да работы 15 адзінак тэхнікі другіх прадпрыемстваў.
Найперш чысцілі гарадскія і запатрабаваныя дарогі, дарогі да медыцынскіх устаноў, пад’езды да могілак (больш як да 100 сельскіх і 7 гарадскіх), пункты прыпынку транспарту, тратуары. Адначасова вялася падсыпка дарог і вуліц.
Дыспетчары, канечне, прымалі заяўкі і заўвагі, але іх было не так многа, як чакалася.
Пасля таго, як зіма нагадала пра сябе на працягу святочных дзён, наступіла паўза. Аднак барацьба з наступствамі снегападу яшчэ працягваецца: чысцяцца дарогі, з гарадскіх вуліц вывозіцца снег.
Алена ШАНТЫКА.