У ААТ «Племянны завод «Індустрыя» набірае тэмпы сяўба азімых збожжавых культур
У сельгасарганізацыях раёна з кожным днём набірае тэмпы сяўба азімых збожжавых культур. У ААТ «Племянны завод «Індустрыя» сёлета адзін з самых вялікіх планаў сяўбы ў раёне — 1500 гектараў. Справіцца з ім пры спрыяльных умовах надвор’я плануюць да канца верасня.
— Асноўная нагрузка ў нашай гаспадарцы цяпер ляжыць на двух сейбітах. Гэта Аляксандр Назаранка і Дзмітрый Бабінскі, — расказвае галоўны аграном ААТ «ПЗ «Індустрыя» Васіль Бойка. — Яны працуюць на МТЗ-3022 з пасяўным агрэгатам АППМ-6 і на трактары «Фэндт» з сеялкай Rabe. Засяваюць да 60 гектараў штодня.
Віктар Савасцюк рыхтуе ім у дзень да 70 гектараў глебы на трактары МТЗ-3522 з культыватарам КШП-10. На ўскрайку поля дзяжураць Анатоль Бязродны на трактары МТЗ-1221 з бункерам, які ўмяшчае да 5 тон насення, і на МТЗ-920 Аляксей Скіндар.
У гаспадарцы першай пачалі сеяць азімую пшаніцу. Ужо пасеяна больш за 570 гектараў, што складае 38 працэнтаў да плана. 130 гектараў засеялі насеннем эліты гатунку «багатка», які набылі ў агракамбінаце «Сноў». Ён — высокапрадуктыўны, пры выкананні ўсіх тэхналагічных патрабаванняў навукоўцы абяцаюць вялікі ўраджай. У сельгасарганізацыі разлічваюць атрымаць першую рэпрадукцыю для далейшага выкарыстання.
Акрамя пшаніцы, у гаспадарцы неабходна пасеяць яшчэ 600 гектараў трыцікале і 150 — азімага жыта.
— На ўчастках, якія засеялі ў першыя дні верасня, ужо з’яві-ліся дружныя ўсходы, — адзначае галоўны аграном гаспадаркі. — Дзесьці каля 350 гектараў. Для гэтага ёсць усе перадумовы. Спрыяе цёплае восень-скае надвор’е.
Шчыруюць механізатары ў полі з 7 гадзін раніцы ўвесь светлавы дзень. У поле ім дастаўляюць гарачыя абеды. Ёсць паліва, спраўная тэхніка. А самае галоўнае — гэта жаданне добра працаваць і ў лепшыя агратэхнічныя тэрміны пакласці зерне ў глебу.
Важна, каб у зімоўку азімыя ўвайшлі ў той фазе, як патрабуецца па тэхналогіі. Вядома, што азімыя культуры вясной хутчэй ідуць у рост, лепш пераносяць адсутнасць вільгаці ў глебе, што часта здараецца ў нашых кліматычных умовах. Зрабіўшы ўсё магчымае, каб зерне легла ў добра падрыхтаваную і запраўленую ўдабрэннямі глебу, у гаспадарцы спадзяюцца на будучы ўраджай, які аддзячыць хлебаробам за шчырую працу.
Анастасія ПЛЯТНЁВА.