У ААТ «Шацк» адзначылі лепшых работнікаў
Нядаўна працаўнікі ААТ “Шацк” у рамках акцыі “Наш жывёлавод” атрымалі падарункі ад райкама прафсаюза работнікаў АПК.
Алена Далідовіч — адна з самых вопытных работнікаў МТФ “Лявонавічы”. На ферму прыйшла ўслед за бацькамі пасля школы і ўжо 15 гадоў працуе тут аператарам машыннага даення.
— Кіраўніцтва гаспадаркі выдзеліла мне кватэру, — гаворыць Алена Мікалаеўна. — У працы стараюся быць прыкладам перш за ўсё для сваіх дзяцей. Мой малодшы сын, якому дзевяць гадоў, ужо ўмее даіць карову.
Аператар па штучным асемяненні жывёлы Алена Карнейчык у свой час атрымала прафесію повара-прадаўца. Але па спецыяльнасці працавала нядоўга. Пазней Алена Віктараўна атрымала прафесію тэхніка-асемянатара. Дарэчы закончыла навучальную ўстанову з чырвоным дыпломам. Больш за дзесяць гадоў яна працуе ў ААТ “Шацк”.
За добрасумленную працу адзначаны таксама загадчыца фермы Кацярына Нячай, аператары машыннага даення Алена Белаш, Ірына Гайдукевіч, жывёлаводы Віктар Парэчын і Аляксандр Сцец.
На МТФ “Міхалевічы” віншаванні прымала мужчынская частка калектыву. Тэхнік-асемянар Сяргей Стасюкевіч чатыры гады таму пераехаў у Шацк з Вілей-скага раёна. За гэты час праявіў сябе з лепшага боку і па ініцыятыве калектыву нядаўна стаў загадчыкам фермы.
— Мы актыўна супрацоўнічаем з райплемстанцыяй. З пачатку года атрымалі на ферме 170 расцёлаў. Цяпер нашы даяркі даглядаюць 96 цялят, — адзначае Сяргей Іванавіч. — У нас дружны калектыў. Я заўсёды падкрэсліваю, што мы працуем для сябе. Пры неабходнасці я таксама дапамагаю калектыву ў любой рабоце.
Жывёлавод Вячаслаў Дубовік пяць гадоў таму прыйшоў у сельгасарганізацыю. Па словах загадчыка фермы, Вячаслаў Рыгоравіч адказны і добрасумленны чалавек, якому можна даверыць любую працу.
Кацярына ДАБРЫЦКАЯ.