У Дзень горада у Мар’інай Горцы нарадзіліся дзве дзяўчынкі
Асабліва шчаслівым Дзень горада стаў для дзвюх пухавіччанак, якія 22 ліпеня сталі матулямі.
Раніцай у радзільным аддзяленні Мар’інагорскай цэнтральнай раённай бальніцы на свет з’явілася дзяўчынка Паліна. Для Дзмітрыя і Карыны Драздоўскіх з пасёлка Праўдзінскі гэта другая дачка.
Павіншаваць з такой радаснай падзеяй Карыну Сяргееўну прыйшлі намеснік старшыні Пухавіцкага райвыканкама Наталля Літвінчук і старшыня Пухавіцкай раённай арганізацыі грамадскага аб’яднання “Белая Русь” Людміла Сарнова. З найлепшымі пажаданнямі яны перадалі маладой матулі падарунак ад абласнога падраздзялення гэтай арганізацыі.
Разам з гасцямі ў палату завітаў муж Карыны Дзмітрый, што стала для яе сапраўдным сюрпрызам. Пасведчанне аб нараджэнні дачушкі шчаслівым бацькам уручыла начальнік аддзела загс райвыканкама Наталля Дубовік.
Ганне Паляковай з Мар’інай Горкі дваццаць другі ліпеньскі дзень падарыў трайное свята.
— Цяпер штогод мы з мужам будзем святкаваць Дзень горада і дні нараджэння адразу дзвюх дачок, — расказала Ганна. — Так супала, што я нарадзіла сваіх дзяцей у адзін дзень з розніцай у адзінаццаць гадоў. Дачку плануем назваць Вікторыей.
Матулі абяцалі, што абавязкова раскажуць сваім дзеткам, што яны з’явіліся на свет у такі незвычайны дзень. Маладым матулям і іх сем’ям госці і ўрачы жадалі моцнага здароўя і шчасця. Мы таксама далучаемся да віншаванняў і спадзяёмся, што дзяўчынкі ў будучым праславяць наш горад.
Кацярына ВЕРНІКОЎСКАЯ.