У эксперыментальнай базе «Зазер’е» пачалі нарыхтоўваць кармы ў палімерную плёнку

У сельскагаспадарчых арганізацыях раёна стаіць задача скасіць першым укосам 12360 гектараў траў. Для патрэб жывёлагадоўлі неабходна нарыхтаваць 8100 тон сена, 172500 тон сенажу і 219500 тон сіласу.

Валерый Каверчык.

У эксперыментальнай базе «Зазер’е» першымі ў раёне пачалі касавіцу. Першым укосам тут трэба будзе ўбраць 590 гектараў шматгадовай травы. Адразу вырашылі ўбраць лугапашавыя ўгоддзі, дзе расце цімафееўка з канюшынай. Гэта папераджальнае падкошванне пашы. Потым яго будуць выкарыстоўваць для пасьбы жывёлы. Ужо скасілі і нарыхтавалі ў стрэйч-плёнку 12 тон сена.

На шыроказахопнай касілцы працуе Георгій Вітушка. За ім у працу ўключаецца Валерый Каверчык, які граблямі робіць валкі. Ён працуе граблямі, якія праходзяць дзяржаўнае выпрабаванне на палях эксперыментальнай базы.

Граблі ГВГ-9,5 — гэта распрацоўка навукова-практычнага цэнтра па механізацыі сельскай гаспадаркі Нацыянальнай акадэміі навук Рэспублікі Беларусь. Шырыня захопу — 9,5 метраў.

Граблі здольны захопліваць за адзін праход чатыры пракосы. Ад звычайных адрозніваюцца тым, што граблевалкавацелі збіраюць траву ў валкі, не дакранаючыся да зямлі, што ўплывае на якасць кармоў. Такімі граблямі можна за працоўную змену прайсці да 70 гектараў.

Намеснік генеральнага дырэктара па эканоміцы і агульных пытаннях РУП НПЦ Нацыянальнай акадэміі навук Беларусі па механізацыі сельскай гаспадаркі Аляксандр Кудрэвіч і дырэктар РСДУП ЭБ «Зазер’е» Аляксандр Турбан.

Інавацыйная распрацоўка будзе праходзіць дзяржаўнае выпрабаванне на зазерскіх палях увесь сезон корманарыхтоўкі. Граблі будуць прадстаўлены на выставе Бел-агра ў Мінску.

У сельгасарганізацыі выйшлі на раннюю ўборку ў многім і для таго, каб абкатаць у рабоце тэхніку, убачыць заганы, ухіліць іх. Першым укосам плануюць закласці 10 тысяч 660 тон сенажу і 12 тысяч 400 тон сіласу.

Першы ўкос, як вядома, самы ўраджайны. Цяпер расліны ў фазе бутанізацыі, поўныя пажыўных рэчываў.

— Вы паглядзіце, якая добрая трава, — праводзіць экскурсію па палях дырэктар эксперыментальнай базы «Зазер’е» Аляксандр Турбан. — Не трэба ніякіх дабавак у такі корм! Калі не ўбраць своечасова, то перарасце і страціць свае вітаміны. А як жа хутка травы растуць пасля дажджу. Ды яшчэ, калі ночы цёплыя. Таму з кожным днём мы ўсё больш уключаемся ва ўборку. У мінулым годзе ў нас было два ўкосы бабова-зёлкавых культур і тры ўкосы люцэрны. У гэтым плануем не менш.

Корманарыхтоўку пачалі і ў іншых сельгасарганізацыях. Пачалі закладваць сянаж у траншэю ў ААТ «Голацк», а ў ААТ «Зазерка» — у палімерную плёнку.

Вядома, зялёнае жніво яшчэ толькі пачынаецца, але зусім хутка, калі пачнецца масавае паспяванне травы, наступяць гарачыя дзянькі ў нарыхтоўцы кармоў першым укосам.

Анастасія ГЛЕБАВА.