У горадзе Бялынічы Магілёўскай вобласці адсвяткавалі Дзень беларускага пісьменства
Жыхароў горада і шматлікіх гасцей свята павіншаваў намеснік кіраўніка Адміністрацыі Прэзідэнта Рэспублікі Беларусь Андрэй Кунцэвіч. Ён жа зачытаў прывітальнае слова ад Прэзідэнта краіны Аляксандра Лукашэнкі.
«Гэта свята — асаблівая падзея ў культурным жыцці Беларусі, — гаворыцца ў пасланні. — На яго пляцоўках адбываецца шматгалосы дыялог майстроў пяра, пісьменнікаў і паэтаў пра лёс слова і культуры, сучаснасць і будучыню нашага народа. Тут сустракаюцца, узбагачаючы творчую ніву, літаратура, музыка, жывапіс і іншыя віды мастацтва. Упэўнены, гэтыя вераснёўскія сустрэчы — добрая падстава для кожнага з удзельнікаў Дня пісьменства яшчэ раз зразумець, што беларусаў, якога б погляду яны не прытрымліваліся, заўсёды аб’ядноўваюць матчына мова, адзіны лёс і Бацькаўшчына. І гэты каштоўны скарб мы павінны зберагчы для нашчадкаў».
На галоўнай сцэне адбылося ўзнагароджанне пераможцаў Нацыянальнай літаратурнай прэміі.
Адным з першых урачыстых мера-прыемстваў Дня пісьменства стала адкрыццё скульптурнай кампазіцыі «З’яўленне іконы». Гранітны анёл упрыгожыў плошчу ля царквы ў гонар іконы Божай Маці Бялыніцкай. Яго вага — каля 2,5 тоны. Яшчэ 75 кілаграмаў важыць бронзавая ікона, якую трымае анёл. Аўтарам скульптуры выступіў магілёўскі майстар Аляксандр Мінькоў.
Урачыста расчыніў свае дзверы і Бялыніцкі мастацкі музей імя Вітольда Бялыніцкага-Бірулі. У новым музеі ўсе жадаючыя могуць пазнаёміцца з карцінамі знакамітага земляка, гісторыяй Бялыніцкага краю. Упершыню ў музеі з’явілася зала «Духоўнасць». Цэнтральным экспанатам стала фрэска «Узыходжанне на Галгофу».
Новы выдатны музей Бялыніцкага-Бірулі абсталяваны ўсімі сучаснымі тэхналогіямі. Ён будзе радаваць не толькі жыхароў Бялыніцкага раёна, але і ўсю нашу краіну. Сюды будзе прыязджаць шмат экскурсій. Плануюцца адпаведныя ўрокі для дзяцей, каб яны ведалі і шанавалі гісторыю нашай краіны.
Увесь цэнтр горада 6 верасня ператварыўся ў вялікую пешаходную плошчу. Адзін з важных момантаў свята — фестываль кнігі і прэсы, дзе госці маглі не толькі азнаёміцца з кніжнымі навінкамі Беларусі, але і набыць упадабанае выданне. Цэнтрам прыцягнення для дзяцей і дарослых стаў друкарскі двор: кожны жадаючы мог паспрабаваць сябе ў ролі кнігадрукара з мінулага.
На фестываль у Бялынічы з’ехаліся рамеснікі з усёй вобласці і іншых рэгіёнаў. Адзенне і ўпрыгажэнні ручной работы, прадметы побыту, разнастайныя тэматычныя сувеніры. Сваю прадукцыю прадставілі тут вядучыя прадпрыемствы харчовай прамысловасці рэгіёна: малочныя і мясныя прадукты, хлебабулачныя вырабы, салодкія ласункі і шмат іншага. Прыехалі на Дзень пісьменства ў Бялынічы і прадстуўнікі прамысловых прадпрыемстваў вобласці: тут яны не толькі прэзентавалі сваю прадукцыю, але і расказвалі пра сваю гісторыю.
Свята атрымалася яркім і цікавым, сабрала мноства гасцей з усёй Беларусі. Завяршыўся Дзень пісьменства ў Бялынічах вялікім святочным канцэртам і яркім салютам.
Знакавым месцам стала пасаджаная ў дзень свята алея гарадоў-сталіц Дня беларускага пісьменства. Эстафету Дня пісьменства ў Бялынічаў прыняў горад Капыль.
Па матэрыялах БелТА.