У «Лясной казцы» дзецям весела і цікава
У «Лясной казцы» за некалькі гадзін да ўрачыстага адкрыцця першай змены стаіць сапраўды казачная цішыня: «ціхую гадзіну» ў дзіцячым лагеры ніхто не адмяняў, таму на тэрыторыі пуста. Толькі птушкі не падпарадкоўваюцца распарадку дня і без стомы радуюцца хай і не вельмі цёпламу, але ж летняму дню…
З дырэктарам лагера Алесяй Глустэнка і старшым выхавальнікам Наталляй Навіцкай мы ходзім паміж карпусамі і вядзём размову пра асаблівасці цяперашняй змены, што заехала на адпачынак усяго некалькі дзён таму.
— У «Лясной казцы» ў чэрвені адпачне 164 чалавекі. Гэта дзеці ад 6 да 14 гадоў, — расказвае Алеся Васільеўна. — Арганізавана 9 атрадаў, сярод якіх усю змену будзе весціся спаборніцтва за званне лепшага калектыву. З дзецьмі працуе 18 выхавальнікаў. Сярод іх — пяць студэнтаў, будучых педагогаў, для якіх праца ў лагеры — першы педагагічны вопыт.
— На падрыхтоўку лагера накіравана 65800 рублёў, — гаворыць загадчык аддзела адукацыі, спорту і турызму райвыканкама Сяргей Усік. — Больш як на 10 тысяч рублёў закуплена тэхналагічнага абсталявання, а таксама мэблі, бялізны. Выкананы рамонт памяшканняў дзякуючы педагогам раёна.
Каб адпачынак дзяцей быў бяспечным, у лагеры ёсць дзяжурны медыцынскі работнік, супрацоўнік міліцыі, арганізавана дзяжурства на прахадной. Усе дзеці прайшлі неабходны інструктаж па тэхніцы бяспекі. Раней запланаванага нават адбылася і вучэбная пажарная трывога: падчас прафілактычнай праверкі сігналізацыі дзеці і выхавальнікі пачулі гук сірэны і арганізавана пакінулі корпус. Так і замацавалі на практыцы тэарэтычныя веды.
Наталля Навіцкая па першых днях знаходжання дзяцей у лагеры не сумняваецца, што змена атрымаецца цікавая. Яна, дарэчы, пройдзе пад назвай «Таямнічыя сусветы».
— Адсюль і назвы некаторых атрадаў: «НЛА», «Камета», «Адрэналін»… У першы ж дзень дзеці выпусцілі тэматычныя атрадныя газеты, каля карпусоў выклалі эмблемы атрадаў (гэта ўжо стала традыцыяй) і правялі першыя творчыя конкурсы, каб выявіць таленты, якія выступяць на ўрачыстым адкрыцці першай змены, — гаворыць Наталля Яўгенаўна. — Дзеці падабраліся актыўныя, таленавітыя. Таму сабраць канцэртную праграму было нескладана.
Для адпачываючых дарослыя падрыхтавалі насычаную праграму актыўнага адпачынку. У лагеры будуць арганізаваны кінасеансы, праца гурткоў цэнтра творчасці дзяцей і моладзі «Світанак», спартыўныя мера-прыемствы, творчыя конкурсы (асабліва ўсе чакаюць Парад мод) і абавязковае агульнае прыгодніцкае мерапрыемства па пошуку таямнічага скарбу.
За гутаркай непрыкметна праляцеў час дзённага адпачынку. Жыццё ў лагеры актывізавалася. З карпусоў «высыпаліся» адпачыўшыя дзеці, многія з якіх адразу ж прыступілі да рэпетыцыі святочнага канцэрта. Першымі на сцэне аказаліся дзяўчынкі, якія пад кіраўніцтвам Вольгі Рыбінскай рыхтавалі танец «Рамонкі».
— Мне вельмі падабаецца працаваць з дзецьмі, — паспявае расказаць мне падчас прагону танца Вольга Рыбінская. — Напэўна, таму я з тых педагогаў, якія пасля завяршэння навучальнага года лёгка знаходзяць сілы і матывацыю працаваць з дзецьмі ў лагеры. Я раблю гэта ўжо восьмы год. І часцей за ўсё застаюся на дзве i больш змены. Ад цяперашніх дзетак з майго атрада чакаю толькі пазітыўных эмоцый. Думаю, што нам усім будзе весела і цікава.
Алена ШАНТЫКА.
