У Мар’інай Горцы адбыўся фінал абласных спаборніцтваў турніру «Скураны мяч»
Так супала, што фінал абласных спаборніцтваў турніру «Скураны мяч» адбыўся ў дні Еўрапейскіх гульняў. Пакуль сталіца жыла прафесійным спортам, юныя аматары футбола сабраліся ў Мар’інай Горцы, каб высветліць, якая ж аматарская футбольная каманда лепшая ў вобласці.
Для даведкі: Гісторыя «Скуранога мяча» пачалася больш за паўстагоддзе таму, калі знакаміты савецкі галкіпер Леў Яшын прапанаваў праводзіць масавыя спаборніцтвы па футболе для дзяцей і падлеткаў. Штогод турнір у Беларусі праводзіцца на прызы Прэзідэнцкага спартыўнага клуба ў трох узроставых групах (малодшай, сярэдняй і старэйшай). Прымаць удзел могуць толькі тыя, хто не займаецца футболам у спецыяльных школах.
Пухавіцкая каманда 2005-2006 гадоў нараджэння, якая стала лепшай па выніках занальных спаборніцтваў, складалася з вучняў Свіслацкай СШ, СШ №3 горада Мар’іна Горка, гімназіі, НПК «Дзіцячы сад-СШ горада Мар’іна Горка».
Шэсць лепшых каманд правялі яркія матчы, у якіх ніхто не хацеў прайграваць. У выніку на п’едэстале гонару апынуліся пухавіччане (3-е месца), футбалісты Вілейскага (2-е месца) і Салігорскага (1-е месца) раёнаў.
Узнагароды пераможцам уручалі прадстаўнікі футбольнага клуба «Шахцёр».
Лепшым нападаючым турніру, дарэчы, стаў Арцём Рысявец, вучань СШ № 3 і выхаванец SOS- Дзіцячая вёска — Мар’іна Горка.
Турнір праводзіўся на працягу двух дзён на базе Мар’інагорскай гімназіі. Удзельнікі спаборніцтваў засталіся задаволены арганізацыяй спаборніцтваў і гасціннасцю пухавіччан.
Алена ІВАНОВА.