У масачным рэжыме не бачу цяжкасцяў — моладзь разважае пра каранавірус
Сярэдзіна звычайнага лістападаўскага дня… Ці не: не зусім звычайнага, таму што ўсё наша жыццё зараз не зусім звычайнае. Вось, напрыклад, заходзячы ў краму, я дастаю з кішэні найперш не кашалёк, а маску. Такія цяпер правілы…
Мужчына, з якім я размінулася ў дзвярах, таксама быў у краме ў масцы. Але, выйшаўшы, зняў яе, скамячыў неабароненай рукой і выкінуў у сметнік. Вецер падхапіў маску, і яна паляцела-пакацілася па вуліцы…
У сувязі з эпідэміялагічнай сітуацыяй у краіне ва ўсе грамадскія месцы я вымушана хадзіць у масцы. Аддаю перавагу шматразовым маскам, таму што лічу іх больш экалагічнымі і практычнымі. Нягледзячы на гэта, заўсёды маю аднаразовую маску ў сумцы на ўсялякі выпадак. Пасля выкарыстання кладу маску ў пакет, каб пазбегнуць распаўсюджвання віруса, і толькі потым выкідваю. А яшчэ, як правіла, хоць і кладу маску ў пакет, перад гэтым адрываю ад яе гумкі. Раблю гэта таму, што велізарная колькасць птушак і дробных жывёл, якія насяляюць звалкі, блытаюцца ў гумках і пашкоджваюць сабе канечнасці. Менавіта такі алгарытм дзеянняў медыкі і эколагі лічаць правільным. Нельга проста так раскідваць маскі па вуліцы.
У масачным рэжыме не бачу ніякіх цяжкасцяў. І мяне вельмі хвалюе, што некаторыя людзі не выконваюць яго з прычыны «я не баюся ці не лічу патрэбным». Упэўнена, што гаворка ідзе пра нашу грамадзянскую адказнасць адзін перад адным.
— Я заўсёды апранаю маску. У краме, у грамадскім транспарце і ў навучальнай установе, — дзеліцца вучаніца Мар’інагорскай гімназіі Паліна Жукоўская. — Для мяне важна захаваць сваё здароўе і здароўе іншых людзей. Я, як і любы чалавек, магу быць пераносчыкам інфекцыйных захворванняў, што могуць аслабіць імунітэт. А моцны імунітэт — гэта самае важнае на сённяшні дзень.
Паліна Бабук, вучаніца Мар’інагорскай гімназіі.