У Пухавіцкім раёне правялі маніторынг малочнатаварных ферм
Напрыканцы мінулага тыдня на ўсіх малочнатаварных фермах нашага раёна пабывалі рэйдавыя групы з прадстаўнікоў камітэта па сельскай гаспадарцы і харчаванні Мінскага аблвыканкама. Вынікі маніторынгу былі падведзены на калегіі, якая прайшла на базе Пухавіцкага райвыканкама.
Узначаліў калегію старшыня камітэта па сельскай гаспадарцы і харчаванні аблвыканкама Сяргей Ляўковіч. Вынікі работы галіны жывёлагадоўлі за 10 месяцаў у Пухавіцкім раёне таксама падводзілі намеснік старшыні камітэта па сельскай гаспадарцы і харчаванні аблвыканкама Уладзімір Капусцін і генеральны дырэктар РУСП “Мінскае племпрадпрыемства” Руслан Беразавік. На калегіі прысутнічалі выконваючы абавязкі старшыні райвыканкама Аляксандр Ласевіч, спецыялісты па жывёлагадоўлі райсельгасхарчу, дырэктары ветэрынарнай і племянной станцый раёна, кіраўнікі сельгасарганізацый.
Тэхналогіі вытворчасці жывёлаводчай прадукцыі, кармленне і ўтрыманне жывёлы, павышэнне сярэднясутачных прываг і надояў малака — на гэтыя пытанні рэйдавыя групы звярталі асаблівую ўвагу. Сельгасарганізацыям раёна трэба папрацаваць над якасцю малака. Большасць гаспадарак здаюць малако вышэйшым гатункам. Трэба імкнуцца да больш прыбытковага гатунку “экстра”.
У некаторых гаспадарках засталіся праблемы, якія тычацца расцёлаў. Важнае правіла пра тое, наколькі важна выпаіць цялят малозівам у першую гадзіну жыцця, на фермах ведаюць, але не ўсюды яго выконваюць.
Падчас калегіі прадстаўнікі аблвыканкама закранулі пытанне пра санітарны стан жывёлаводчых аб’ектаў. Аб графіку санітарных дзён і паняцці “чысты чацвер” ведаюць на ўсіх фермах, але не ўсюды ставяцца да яго адказна.
Па выніках калегіі былі выданы прадпісанні. Асноўныя заўвагі тычацца рамонту кормараздатчыкаў, захаванасці маладняку і арганізацыі работы па штучным асемяненні жывёлы.
Кацярына ДАБРЫЦКАЯ.