У раёне працягваецца ўборка саломы

Васіль Бруханчык і Юрый Клеўка.

Салома —  гэта і якаснае арганічнае ўдабрэнне, і добры подсціл для жывёлы, таму гаспадаркі раёна яе актыўна і акуратна назапашваюць. У цэлым у раёне запрасавана больш за 13350  гектараў, звезена больш за 10300 тон.

ААТ “Племянны завод “Індустрыя” ў ліку лідараў па гэтым паказчыку. Ужо запрасавана 1138 гектараў, звезена 906  тон.  Салому вывозяць да фермаў і складваюць у скірды. Частка ідзе на подсціл выгульных двароў.

— Салому мы пачалі ўбіраць практычна ўслед за камбайнамі, — расказвае галоўны аграном Васіль Бойка. — Месцамі здрабнялі і пакідалі на палях як арганічнае ўдабрэнне, большасць прасуем і будзем выкарыстоўваць як корм ці подсціл для жывёлы. З  мінулага года  засталося толькі 20-30 тон саломы, таму сёлета плануем назапасіць не менш.

Для гэтага ёсць усе падставы. Па выніках жніва хлебаробы з “Індустрыі” атрымалі рэкордны намалот для гаспадаркі  —  9518 тон. Па разліках спецыялістаў, 4500 тон саломы дакладна будзе нарыхтавана. Для сельгаспрадпрыемства гэтага дастаткова.

Дзмітрый Бабінскі.

Займаецца нарыхтоўкай саломы звяно земляробаў,  якое ўзначальвае начальнік вытворчага ўчастка “Пухавічы” Ірына Лінская. З прэс-падборшчыкамі ПРФ-180 працуюць Юрый Клеўка і Сяргей Бабінскі. Маладому механізатару Дзмітрыю Бабінскаму ўпершыню даверылі  прэс-падборшчык “Тарнада”.  Гэта больш высокапрадукцыйная тэхніка, якая выкарыстоўваецца не толькі для нарыхтоўкі саломы, але і на прасаванні сена і на нарыхтоўцы сенажу ў стрэтч-плёнку.  На пагрузачна-разгрузачных работах задзейнічаны Ігар Лінскі і Васіль Бруханчык.

Сяргей Бабінскі.

— З-за дажджу мы вымушаны зрабіць перапынак у прасаванні саломы. Апошнія дні займаемся толькі адвозкай. Да гэтай справы далучылі Юрыя Клеўку і Сяргея Бабінскага. У іншыя дні на адвозцы працуе наш  Ігар Карынец і запрошаная тэхніка, — працягвае Васіль Пятровіч. — Збожжавыя культуры ў нас займалі 2550 гектараў. Наперадзе яшчэ шмат клопатаў з саломай, але ўпэўнены, што наша звяно своечасова справіцца са сваёй задачай.

Кацярына  ВЕРНІКОЎСКАЯ.

 

Добавить комментарий

Ваш e-mail не будет опубликован. Обязательные поля помечены *