У стагоддзе інфармацыйных тэхналогій аддзяленне паштовай сувязі Азярычына не пустуе
Да начальніка аддзялення паштовай сувязі Азярычына Ганны Гралеўскай мы завіталі ў другой палове дня. Пошта ў гэты час ужо не працуе, але Ганна Пятроўна хутка дабралася з дому на сваё працоўнае месца. Гэтым маршрутам жанчына ходзіць ужо на працягу 32 гадоў.
У паштовае аддзяленне яна прыйшла пасля вучылішча адразу на пасаду начальніка. Асвоілася без праблем: у Азярычыне Ганна Гралеўская нарадзілася і вырасла, таму працаваць з аднавяскоўцамі было проста.
Пасля заканчэння школы перад ёй паўстала пытанне: стаць настаўніцай або пайсці ў сферу паслуг. Пра свой выбар яна ніколі не пашкадавала і цікаўнасць да прафесіі за столькі гадоў не згубіла.
Паштовае аддзяленне ва ўсе часы было самым папулярным месцам у вёсцы. Людзі адпраўлялі лісты, паштоўкі. Сёння, у стагоддзе інфармацыйных тэхналогій, многае змянілася, але памяшканне пошты не пустуе. Адны прыходзяць заплаціць за камунальныя паслугі, другія — набыць бытавыя і іншыя тавары.
— Таксама нашы жыхары выпісваюць газеты і часопісы. Многія на працягу гадоў нязменнай крыніцай інфармацыі выбіраюць “раёнку”, — расказвае Ганна Пятроўна. — Паштальён Ірына Крук, з якой працуем разам ужо сямнаццаць гадоў, прыносіць чытачам свежыя выданні.
Летам у Азярычына прыязджаюць дачнікі, якія таксама карыстаюцца паслугамі паштовай сувязі.
Раней з аддзяленнем паштовай сувязі суседнічалі кантора сельгаспрадпрыемства і прыёмны пункт камбіната бытавога абслугоўвання. Цяпер Ганна Гралеўская — адзіная гаспадыня вялікага будынка. Але ў сваім памяшканні яна здолела стварыць утульную атмасферу, куды людзям хочацца вяртацца зноў і зноў.
Кацярына ВЕРНІКОЎСКАЯ.