У СУП “Дукора-Агра” працуюць без выхадных
Яравы клін збожжавых і зернебабовых культур у СУП “Дукора-Агра” складае 1100 гектараў. Гэта адна з самых вялікіх пасяўных плошчаў у раёне.
Ужо пасеяна пшаніца. Наступіла чарга ячменю. На пасяўной у гаспадарцы задзейнічаны два вопытныя сейбіты: Андрэй Сачок і Віктар Мялаў. Падрыхтоўкай глебы займаюцца Уладзімір Давыдзенка і Юрый Шлык.
Магутны трактар “Джон Дзір” з сеялкай “Фогель Нут”, на якім працуе Віктар Мялаў, нечакана з’яўляецца на пагорку каля фермы Харавічы. Механізатар пад’язджае да Уладзіміра Акуліча, каб запоўніць бункер насеннем.
— Зямля падсохла, цяпер значна лягчэй сеяць. Гэтае поле не складанае па канфігурацыі, і падгоркі цяжкасцей не дастаўляюць, — расказвае Віктар Мялаў, сейбіт з 25-гадовым стажам. — Тэхніка рухаецца з хуткасцю 10-12 кіламетраў у гадзіну. Поўнага бункера насення хапае прыкладна на 4-5 гектараў.
У гэтыя напружаныя дні механізатары працуюць без выхадных. Перапынкі двойчы на дзень: на абед і падвячорак, якія ў поле прывозіць раздатчыца Людміла Шыкуць.
Тым часам у сталовай гаспадаркі работа кіпіць не менш актыўна, чым на палях. Задача накарміць земляробаў ускладзена на загадчыцу сталовай Кацярыну Пахомаву і памочніка повара Юлію Іванчанка. У гарачы сезон палявых работ сталовая працуе без выхадных.
— Штодзень гатуем каля пяцідзесяці абедаў і падвячоркаў. У выхадныя дні ў нас харчуюцца таксама механізатары ААТ “Машхарчпрад”, таму порцый гатуем больш, — расказвае загадчыца сталовай.
Кацярына Пахомава і Юлія Іванчанка працуюць паварамі ўжо па дзевяць гадоў. Жанчыны не толькі калегі: яны аднакласніцы і аднагрупніцы. На работу прыходзяць заўсёды з усмешкамі: добры настрой таксама ўплывае на працэс прыгатавання ежы і яе смак.
Кацярына ВЕРНІКОЎСКАЯ.