У СУП «Дукора-Агра» ёсць дасягненні і патэнцыял
Механізатары Дзмітрый Шаўцоў, Мікалай Судніковіч, дырэктар Аляксандр Славікоўскі, механізатары Сяргей Дрынеўскі, Аляксандр Давыдзенка, Юрый Шлык.
— Гэты год праляцеў як адзін дзень, — пачынае размову кіраўнік СУП «Дукора—Агра» Аляксандр Славікоўскі. — Для нас ён быў даволі паспяховым. Мы дасягнулі паказчыкаў, на якія разлічвалі.
Аляксандр Віктаравіч адлічвае сваю дырэктарскую біяграфію з лістапада мінулага года. Разам з калектывам гаспадаркі ён сустракае не толькі прафесійнае свята, але і 90-гадовы юбілей сельгаспрадпрыемства. Сённяшнім дукорскім работнікам не сорамна глядзець у вочы папярэднікам: у гаспадаркі ёсць шэраг дасягненняў, ёсць і патэнцыял.
Галоўны інжынер Аляксандр Барычэўскі.
Пераможца раённага спаборніцтва
СУП “Дукора-Агра” — пераможца раённага спаборніцтва на вясенне-палявых работах і сяўбе азімых культур. Усё заканамерна: загадзя падрыхтавалі тэхніку, добра і зладжана папрацавалі вясной — летам атрымалі добры ўраджай. Агульны намалот зерневых культур склаў 9700 тон, што значна перавышае мінулагодні паказчык. Сярэдняя ўраджайнасць — 41 цэнтнер з гектара. Два з сямі экіпажаў камбайнаў намалацілі больш за дзве тысячы тон. Тысячнікамі сталі ўсе камбайнеры.
Невыпадкова работнікі СУП “Дукора-Агра” вялікай дэлегацыяй прыехалі на раённыя “Дажынкі”. Дзякуючы іх намаганням гаспадарка пастаянна ўваходзіць у лік лідараў. Добрых слоў заслугоўваюць вадзіцель Анатолій Крайко, механізатары Уладзімір і Аляксандр Давыдзенкі, Юрый Шлык, Павел Абакунчык, Сяргей Фралоў, Сяргей Дрынеўскі і іншыя.
Прараб Іван Саранкоў.
— Бывае, несправядліва незаўважанымі застаюцца работнікі ферм. Валерый Блашко раздае кармы, Алег Лецяга займаецца іх пагрузкай. На абслугоўванні ферм Мікалай Фралоў і Віктар Паўлечка часта працуюць без выхадных. На такіх самаадданых людзях і трымаецца гаспадарка, — гаворыць Аляксандр Славікоўскі.
За год пад кіраўніцтвам новага дырэктара прыкметна змяніўся мехдвор. Палепшыліся бытавыя ўмовы: з’явіліся душавыя кабіны, абсталявалі пакой для прыёма ежы. Змяніўся мехдвор і знешне: устанавілі шлагбаум, паклалі асфальт, пабудавалі мойку, памянялі асвятленне, правялі іншыя работы. Такія перамены не засталіся без увагі: мехдвор гаспадаркі будзе прымаць удзел у рэспубліканскім аглядзе-конкурсе машынных двароў.
Машынна-трактарны парк сёлета папоўнілі 18 адзінак тэхнікі, сярод якіх чатыры трактары, кормараздатчык, сеялка і культыватар. Амаль на ўсіх трактарах і машынах устанавілі навігацыйную сістэму.
Галоўны аграном Сяргей Ракуцька і аграном-аграхімік Аляксандр Кротаў.
“Санаторый” для жывёлы
Аляксандр Славікоўскі па спецыяльнасці інжынер, але цяпер, здаецца, можа прачытаць лекцыю пра жывёлагадоўлю. Менавіта на гэту галіну з пачатку свайго кіраўніцтва скіраваў усе сілы малады дырэктар. Першапачатковая задача — стварыць камфортныя ўмовы для ўтрымання жывёлы і палепшыць яе захаванасць — выканана.
— У гэтым годзе хапіла працы нашай будаўнічай брыгадзе з сямі чалавек, якую ўзначальвае прараб Іван Саранкоў, — працягвае дырэктар. — Пры дапамозе сродкаў з абласнога бюджэту мы пабудавалі клюшачнік на таварнай ферме “Дукарка”. Дапамог нам таксама інвестар — ААТ “Машхарчпрад”. Будаўніцтва пачалося вясной, наваселле ў жывёлы ўжо адбылося. У новы будынак паставілі 280 цёлак. Для іх створаны бадай што санаторныя ўмовы: новыя паілкі, светадыёдныя ліхтары, бетаніраваная падлога.
Загадчыца малочна-таварнага комплексу Алена Яблонская і яе памочнікі Алена Дашкевіч і Марыя Федарынчык.
Яшчэ адно наваселле адбылося на МТФ “Харавічы” — самым буйным аб’екце сельгас-прадпрыемства. Драўляны цялятнік там пабудавалі за свае сродкі і ўсяго за 21 дзень. У пошуках таннага і сучаснага праекта кіраўнік аб’ездзіў усю Беларусь. Цялятнік разлічаны на 70 галоў, есць выгульны дворык. У летні перыяд можна выкарыстоўваць на 140 галоў.
На таварнай ферме ў Галенбергу вырошчваюць бычкоў на адкорм. Цяпер іх каля 500. У планах паставіць на адкорм 1000 бычкоў.
Да зімы ў гаспадарцы падрыхтаваліся. Нарыхтавана 38 кармавых адзінак на ўмоўную галаву пры запатрабаваных 24. Гэта самы вялікі паказчык у раёне. Лідзіруе СУП “Дукора-Агра” і па нарыхтоўцы сенажу: закладзена 16 450 тон. Сіласу аграрыі нарыхтавалі 15 800 тон.
За жывёлагадоўчую галіну адказваюць галоўны заатэхнік Уладзімір Арлоўскі, вопытны тэхнік-асемянатар Наталля Лучанок і заатэхнік-селекцыянер Яраслаў Швяцоў.
На працу прыходзіць і моладзь. У загадчыцы малочна-таварнага комплексу Алены Яблонскай і яе памочніка Марыі Федарынчык, стаж якіх перавышае трыццаць гадоў, вопыт пераймае малады спецыяліст Алена Дашкевіч. Яна выпускніца Гродзенскага аграрнага ўніверсітэта. Муж Алены працуе галоўным заатэхнікам у суседняй гаспадарцы.
Галоўны заатэхнік Уладзімір Арлоўскі.
— Славу кожнай гаспадаркі робяць людзі. Пра нашых работнікаў можна гаварыць многа, — падсумоўвае дырэктар Аляксандр Славікоўскі. — Напярэдадні прафесійнага свята і юбілея сельгаспрадпрыемства хачу павіншаваць усіх ветэранаў гаспадаркі і цяперашніх работнікаў. Шчыра дзякую за вашу працу. Яна цяжкая, але такая неабходная. Жадаю ўсім моцнага здароўя, шчасця, сямейнага дабрабыту і добрых заробкаў.
Кацярына ВЕРНІКОЎСКАЯ.
