Васіль Брандт стаў лепшым у раёне на ворыве
— Як атрымаў гэты трактар, з таго часу і ў перадавіках, — жартуе механізатар ААТ “Агра-Абярэг” Васіль Брандт, атрымліваючы сваю чарговую ўзнагароду. Васіль Уладзіміравіч стаў лепшым у раёне на ворыве. Ён заараў больш за 630 гектараў. Памятны дыплом і падарунак атрымаў ад райкама прафсаюза работнікаў АПК.
На сваім “Джон Дзіры” Васіль Брандт працуе ўжо чатырнаццаць гадоў. Агульны стаж працы ў сельскай гаспадарцы — у два разы большы. Свой трактар механізатар даглядае, таму тэхніка заўсёды спраўная і нават знешне выглядае значна маладзейшай.
— Вясеннія палявыя работы — традыцыйна час высокіх заробкаў, таму стараюцца ўсе, — гаворыць Васіль Брандт. — Хочацца, каб нашу справу прадоўжыла актыўная і працавітая моладзь. Таму мы павінны быць для яе прыкладам.
Гэтымі днямі механізатар задзейнічаны на корманарыхтоўцы.
Кацярына ДАБРЫЦКАЯ.