З канцэртамі — да хлебаробаў
Жніво — гарачая пара і для артыстаў-аматараў. Творчыя калектывы, якія працуюць пры сельскіх дамах культуры, сёння можна сустрэць і на палетках, і на зернесушыльных комплексах. Каб падтрымаць хлебаробаў, у якіх зараз напружаны час, яны падрыхтавалі канцэртныя праграмы.
Удзельнікі ансамбля «Весялуха» Голацкага сельскага Дома культуры (на здымку) выступілі перад камбайнерамі ААТ «Голацк», наведалі і зернесушыльны комплекс, дзе таксама адбыўся канцэрт.
Ансамбль народнай песні «Вярбічанька» Дрычынскага сельскага Дома культуры выступіў з канцэртнай праграмай на зернесушыльным комплексе СВФ «Дрычын». Акрамя песень, прысвечаных хлебу і роднаму краю, у адрас хлебаробаў прагучалі добрыя пажаданні. Усім работнікам комплексу былі ўручаны кветкі.
Спецыяльна для хлебаробаў падрыхтавалі святочную праграму і аматарскія калектывы Зазерскага СДК. Палі ААТ «Зазерка» сталі канцэртнай пляцоўкай для ансамбля «Жытніца» і дзіцячых творчых калектываў, створаных пры Доме культуры. Асаблівыя віншаванні артысты-аматары падрыхтавалі для лідараў жніва ў гаспадарцы: камбайнера Іона Панфіла і вадзіцеляў Аляксандра Холада і Міхаіла Навіцкага. А дырэктар Зазерскага СДК Ларыса Пятровіч спякла для хлебаробаў каравай з зерня новага ўраджаю.
Наталля ВАСІЛЬЕВА.