ПСУ “Рудзенскае”. Адданыя выбранай справе.

Не памылюся, калі скажу, што работа сельскіх працаўнікоў — адна з самых складаных і адначасова незаменных. Клопаты вяскоўцаў заўсёды  неадкладныя: усе земляробчыя работы павінны быць тэрмінова зроблены, а кармленне і даенне жывёлы на фермах —  абавязковыя штодзённыя працэсы. 

Як і многія работнікі сельскай гаспадаркі, калектыў ПСУ “Рудзенскае” УП “Мінскметрабуд” святочныя  дні часта сустракае на працы. У рупліўцаў гаспадаркі даўно няма звычкі скардзіцца і наракаць на гэтыя цяжкасці, бо справа ладзіцца толькі тады, калі працуеш плённа і самааддана.

Чарговы сельскагаспадарчы сезон набіжаецца да фінішу. Вынікі большасці земляробчых работ ужо падведзены.  Сёлета намалочана 4733 тоны збожжа, што на 1509 тон больш у параўнанні з мінулым годам. Зернем рапсу засекі гаспадаркі папоўніліся на 405 тон, і гэта на 353 тоны больш, чым у мінулым годзе.

У гэтым дасягненні земляробам паспрыяла надвор’е. Аднак і яны загадзя нямала папрацавалі на ўраджай: унеслі ўвесь комплекс арганічных угнаенняў,  фосфарных  і азотных удабрэнняў, паклапаціліся аб сродках аховы раслін. Фуражным зернем і кармамі на зіму сябе забяспечылі поўна-сцю. Нарыхтавана 24 цэнтнеры  кармавых адзінак на ўмоўную галаву. Добра папрацавалі на ўборцы саломы. Іван Паддубоцкі запрасаваў 1200 тон.

Цяпер агранамічная служба вядзе падрыхтоўку да наступнага года. Кіпіць работа на зернетаках: там вядзецца чыстка насення. Канюшына, цімафееўка і ячмень ужо чакаюць свайго часу сяўбы. Хутка завершыцца пратручванне пшаніцы.

Зараз земляробы актыўна вывозяць арганіку на палі. На гэтым відзе работ задзейнічаны Ігар Блашко — адзін з лепшых механізатараў гаспадаркі. На сельгаспрадпрыемства ён прыйшоў дванаццаць гадоў таму.

— Год я працаваў пастухом, пасля сеў за руль трактара, — расказвае Ігар Сямёнавіч. — Я пастаянна задзейнічаны на сяўбе, падрыхтоўцы глебы і ворыве. Цяпер працую ў звяне з Віталем Шывягам: ён грузіць арганіку.

Паспяхова працуе і галіна жывёлагадоўлі. Сёння ў гаспадарцы  налічваецца 1762 каровы, з іх дойны статак —  672 каровы. Валавы надой за дзесяць месяцаў склаў 27680 цэнтнераў. Надой на карову за гэты ж перыяд — 4131 кілаграм, што на 508 кілаграмаў больш да ўзроўню мінулага года. Малако здаюць  гатункамі “экстра” і “вышэйшы”. За 10 месяцаў прадалі дзяржаве 25343 цэнтнера малака: на 4075 цэнтнераў больш, чым у 2016 годзе. Рост малака звязаны з уводам у агульны статак 36 нецелей.

—Таксама гэты вынік штодзённай карпатлівай працы аператараў машыннага даення, загадчыкаў ферм і жывёлаводаў, — падкрэслівае дырэктар Ігар Бабярэнка. —  Шмат увагі мы надалі  тэхналогіям: вырашылі, што на кожнай ферме павінен быць кормараздатчык і пагрузчык для своечасовага кармлення жывёлы. Набыць неабходную тэхніку нам дапамагло УП “Мінскметрабуд”.Таксама ў гэтым годзе пабудавалі дзве сіласна-сянажныя траншэі на  малочнатаварных фермах. Яны ўжо запоўнены кармамі. За свае сродкі набылі трактар “Беларус -1223”.

Па вытворчых паказчыках у гаспадарцы вылучаюцца аператары машыннага даення з МТФ “Крыніца” Ірына Ніканорава і Алена Блашко. Жанчыны працуюць тут больш за 25 гадоў. На ферму  прыйшлі па прыкладзе сваіх матуль. Перад сабой вопытныя аператары машыннага даення ставяць перспектыўныя мэты: надаіць па 5000 кілаграмаў малака. З пачатку года Ірына Аляксандраўна  надаіла 4091 кілаграм на карову, Алена Канстанцінаўна — 4050 кілаграмаў малака.

—Тыя, хто любіць  сваю прафесію, ставяцца да яе асабліва. Алена Блашко і Ірына Ніканорава дакладна з ліку такіх людзей. Іх адносіны да справы бачны па адно-сінах да жывёлы, — гаворыць загадчыца фермы Любоў Быстрова. — У нас склаўся добры калектыў. Мне ў розных пытаннях вельмі дапамагае слесар Уладзімір Крывашэяў.  Важная задача ў нашага тэхніка-асемянатара Таццяны Молчан.

—Я абслугоўваю 64 жывёлы, ёсць у гэтым ліку і цяляты, — расказвае Ірына Ніканорава. —  Ферма ў нас самая звычайная. І асабіста мне так прасцей  працаваць, бо кожная карова  адразу становіцца на сваё месца і ведае сваю мянушку.

Падчас нашай размовы з Ірынай Аляксандраўнай у кароўкі з яе групы нарадзілася цялятка. Выпадкова я ўпершыню стала сведкай такой  цікавай падзеі. Дарэчы, фотаздымак аператараў машыннага даення на ферме мы зрабілі побач з цяляткам, якое нарадзілася ўсяго за некалькі гадзін да нашага прыезду.

Таксама на ферме нядаўна правялі рэканструкцыю цялятніка. Цяпер гэта сучаснае памяшканне на 250 галоў. Ранейшы быў разлічаны на 150.

Ёсць добрыя вынікі таксама ў малочнатаварнай фермы “Русаковічы”. Ірына Камінская даглядае цялят ад нараджэння да чатырох месяцаў. Сярэднясутачная прывага ў вазе ў яе групе  — больш за 800 грамаў.

У калектыў сельгасарганізацыі пастаянна прыходзяць маладыя спецыялісты. Летам сваю працоўную дзейнасць у ПСУ “Рудзенскае” пачалі  брыгадзір сельскагаспадарчага ўчастка Святаслаў Касянюк і аграном па насенняводстве Ягор Вашкевіч.  Маладыя людзі  з Брэсцкай вобласці, прыехалі ў гаспадарку пасля заканчэння Гродзенскага дзяржаўнага аграрнага ўніверсітэта. Шмат моладзі працуе ў інжынернай службе. Кіраўніцтва гаспадаркі зацікаўлена ў таленавітых кадрах, таму некаторым работнікам прадастаўляе здымныя кватэры.

…Учора ўсяго на некалькі гадзін калектыву сельгасарганізацыі ўдалося  адкласці працоўныя клопаты і сабрацца на святочную праграму ў Рудзенскім Доме культуры.  Дырэктар ПСУ “Рудзенскае” і прадстаўнікі УП “Мінскметрабуд” падзякавалі ўсім за працу і ўзнагародзілі лепшых работнікаў, якія пасля  вярнуліся да сваіх звычайных абавязкаў у няпростай сельскагаспадарчай сферы, якой адданыя ўсім сэрцам.

Кацярына  ВЕРНІКОЎСКАЯ.

Шчыра  віншуем усіх цяперашніх  і былых работнікаў нашай гаспадаркі, калег з іншых сельгасарганізацый з прафесійным святам. Дабрабыт сельгас-арганізацыі  залежыць ад вас, нашых работнікаў. Шчыра дзякуем  усім за працу!  Найперш жадаем моцнага здароўя, матэрыяльнага дабрабыту, прафе-сійных поспехаў і працоўных дасягненняў. Няхай здзяйсняюцца ўсе мары, а добры настрой, каханне і ўсмешкі будуць пастаяннымі спадарожнікамі па жыцці.

Адміністрацыя, прафсаюзны камітэт  ПСУ “Рудзенскае”.