Чарговым ўдзельнікам акцыі “Наш жывёлавод” стала ААТ “Ражджэственскае-агра”.
Чарговымі ўдзельнікамі акцыі “Наш жывёлавод” сталі работнікі ААТ “Ражджэственскае-агра”. Пасля ранішняй дойкі яны прымалі віншаванні і падарункі ад старшыні райкама прафсаюза работнікаў АПК Людмілы Ленкавец і старшыні прафсаюзнага камітэта гаспадаркі Святланы Казлоўскай.
На сённяшні дзень у гаспадарцы склалася няпростая сітуацыя. Сельгаспрадпрыемства знаходзіцца на апошнім месцы па сярэднім надоі малака ад каровы і на адной з апошніх пазіцый па вытворчасці малака. Выпраўленне становішча — справа не аднаго дня. Многае залежыць ад кіраўніцтва і ад людзей. Падтрымаць работнікаў ферм і звярнуць увагу на іх няпростую працу — галоўная мэта акцыі “Наш жывёлавод”.
На МТФ “Ельнік” падарункі атрымалі загадчыца фермы Алеся Балаховіч, ветфельчар Вольга Петракова, аператары машыннага даення Таццяна Петракова, Вольга Тарасік і Галіна Скачок.
Дойны статак на ферме налічвае 400 галоў. Тут працуюць пяць асноўных аператараў даення і адна падменная даярка. Алеся Балаховіч сумяшчае абавязкі загадчыцы і тэхніка-асемянатара. Работа адказная і важная.
— Калісьці гэтым жа складам мы працавалі на ферме ў Турыне і занялі другое месца ў раёне па валавым надоі малака, — расказвае Алеся Віктараўна. — Хацелася б і зараз мець лепшыя вынікі. Мы стараемся працаваць, выконваем свае абавязкі, нягледзячы на няпростае эканамічнае становішча гаспадаркі. Добрых слоў у свой адрас заслугоўваюць усе нашы жывёлаводы.
Ніна Крэмень прыйшла сюды на працу 22 гады таму. Спачатку была аператарам машыннага даення. Пазней жанчыне прапанавалі стаць тэхнікам-асемянатарам на малочнатаварнай ферме “Слабада”.
— Вельмі хвалявалася, калі пераходзіла на гэтую пасаду, аднак у мяне ўсё атрымалася: пачалі нара-джацца двойні, вытворчыя паказчыкі павялічваліся. І, галоўнае, мне падабалася сама праца, таму я скончыла курсы асемянатараў і ўжо 17 гадоў нязменна працую на ферме, — гаворыць Ніна Рыгораўна. — Апошнія тры гады таксама кірую фермай. Усе пытанні мы вырашаем калектыўна і заўсёды спраўляемся сваімі сіламі.
Памятныя падарункі аб прафсаюзнай акцыі “Наш жывёлавод” застануцца таксама ў аператара машыннага даення МТФ “Слабада” Марыі Крывашэй і загадчыцы МТФ “Баські” Алены Бурай.
Для жывёлаводаў фермы “Ананічы” Аляксандра Жгута і Ігара Маругі прыезд прафсаюзных лідараў быў нечаканым і таму асабліва прыемным. Мужчыны даглядаюць цялят, якіх на ферме цяпер знаходзіцца 312 галоў. Сярэднясутачныя прывагі ў групе Аляксандра Аляксандравіча за мінулы год склалі 566 грамаў, у групе Ігара Іванавіча — 524 грамы.
Адной з мэтаў дадзенай акцыі з’яўляюцца сустрэчы з працоўнымі калектывамі. Яны даюць магчымасць прадстаўнікам прафсаюза даведацца пра пытанні і праблемы, якія хвалююць людзей. Такія грунтоўныя размовы адбыліся на ўсіх фермах гаспадаркі.
Кацярына ВЕРНІКОЎСКАЯ.