Японскі фокуснік выступіў у Мар’інай Горцы
Убачыць, як у пустым капелюшы з’яўляецца жывы звярок, як у часопісе паміж старонкамі знікае вада, як развязваюцца адным рухам рукі немагчыма складаныя, на першы погляд, вузлы — усё гэта змаглі ўбачыць жыхары «SOS-Дзіцячая вёска Мар’іна Горка» ў нядзелю: у госці да дзяцей прыязджаў 85-гадовы японскі фокуснік Макс Ватанабе.
Хлапчукі і дзяўчынкі шчыра радаваліся, гледзячы, як на іх вачах адбываецца нават маленькі цуд, і вельмі хацелі далучыцца да яго ажыццяўлення, таму чараўнік Макс ахвотна заклікаў дзяцей на дапамогу.
Дзеці пры гэтым пільна назіралі за досыць спрытнымі рухамі рук 85-гадовага японца і спрабавалі зразумець, як жа адбываецца гэты цуд. Але нават у непасрэднай блізкасці ад фокусніка сакрэт заставаўся сакрэтам.
Зрэшты, у зале ўсё ж былі і тыя, хто ведаў пра сутнасць пастаноўкі некаторых трукаў. Яе адкрыў дзецям сам маг, калі напярэдадні правёў майстар-клас для ўсіх жадаючых.
Японскі фокуснік такія падарожжы па розных краінах разглядае як сваю місію рабіць дзяцей больш шчаслівымі. Беларусь, паводле яго слоў, стала 103-й краінай, куды Макс прыехаў, каб парадаваць сваім майстэрствам тых, хто застаўся без апекі бацькоў.
Алена ШАНТЫКА.