Вызначыліся лідары па намалотах!
Жніво ў раёне перасягнула свой экватар. Да фінішнай прамой набліжаюцца аграрыі КСУП «Аграсімвал», «Турынскае». Самую вялікую ўраджайнасць — амаль 42 цэнтнеры збожжа з гектара — атрымліваюць у КСУП «Голацк».
У лідарах па намалотах таксама і КСУП «Агра-Абярэг». У гаспадарцы вызначыліся свае перадавікі: камбайнер Уладзімір Асіпук на КЗС-1624 ужо намалаціў 1044 тоны збожжа. З гэтым працоўным поспехам прама на полі яго павіншаваў старшыня Пухавіцкага райвыканкама Віктар Каляда. Віктар Міхайлавіч уручыў камбайнеру-перадавіку падзяку і пажадаў новых поспехаў на ўборцы ўраджаю.
Гэты год для працаўнікоў КСУП “Агра-Абярэг” не назавеш лёгкім. Шмат намаганняў было прыкладзена, каб вырасціць багаты ўраджай. Парадавала азімая пшаніца, якой намалочваюць па 44 цэнтнеры з гектара, і піваварны ячмень — па 43 цэнтнеры зерня (летась ураджайнасць яго была 30 цэнтнераў). Вядома, надвор’е ўнесла свае карэктывы, але нягледзячы на гэта ў гаспадарцы дабіваюцца добрых паказчыкаў. Убіраюць хлеб 9 камбайнераў, на адвозцы задзейнічаны 8 вадзіцеляў. Усе стараюцца ўбраць без страт і як мага хутчэй.
На гэтым тыдні перасягнулі тысячную мяжу і чатыры экіпажы камбайнераў КСУП «Індустрыя-СГ».
У гэтай гаспадарцы плошча ўборкі — адна з самых вялікіх у раёне: 2535 гектараў. Зараз намалочваюць па 30 цэнтнераў збожжа з гектара. Пры добрым надвор’і ўбіраюць кожны дзень ад 3 да 5 працэнтаў ад агульнай плошчы.
Нягледзячы на засушлівы ліпень, які негатыўна адбіўся на паспяванні культур, тут задаволеныя ўраджаем азімай пшаніцы, якая дае па 46,5 цэнтнера з гектара, азімага трыцікале — ад 33 да 36 цэнтнераў. Першыя гектары ўбіралі вільготнасцю ад 10 да 13 працэнтаў, таму дапрацоўка збожжа была мінімальнай. Ужо цалкам убраныя зернебабовыя культуры, сабрана больш за 6 тысяч тон збожжа.
На палях убіраюць і салому, якой нарыхтавалі ўжо 685 тон. Яе адразу здрабняюць там, дзе будзе весціся ў далейшым сяўба азімага рапсу. У сельгасарганізацыі прааналізавалі, што азімая культура дае ўраджай большы, чым яравая: у выпадку не спрыяльнай для раслін зімы ёсць магчымасць перасеяць пацярпелыя ўчасткі вясной, таму плошчу пад азімы рапс у гаспадарцы плануюць павялічыць да 2 тысяч гектараў.
Анастасія ПЛЯТНЁВА.