Адбылася прэзентацыя кнігі пра малую радзіму
Юрась і Зміцер Санько падчас прэзентацыі кнігі.
“Яна жыццё дала мне…”. Гэтыя радкі з песні пра малую радзіму сталі дэвізам да мерапрыемства, якое прайшло нядаўна ў Азярычынскім НПК дзіцячы сад—базавая школа і было прысвечана прэзентацыі кнігі “Слаўнае сяло Азярычына: свет нашых продкаў”.
Аўтары кнігі — выпускнікі школы Зміцер і Юрась Санько. На сустрэчу з імі прыйшлі не толькі вучні і настаўнікі, але і жыхары навакольных вёсак.
Кніга — вынік шматгадовай працы, пранізанай пашанай да родных вытокаў, жаданнем паслужыць сваёй малой радзіме. У ёй змешчаны разна-стайны матэрыял пра вёску Азярычына: вынікі археалагічных даследаванняў, гістарычны нарыс, песні, якія спявалі нашы продкі, успаміны азярычынцаў пра іх жыццё.
Аўтары расказалі, як кніга стваралася, выказалі падзяку тым, хто дапамог у зборы матэрыялаў.
Са словамі падзякі выступілі вучні школы Ангеліна Рунец і Карына Камлюк. Калі гэтыя дзяўчынкі знаёміліся з кнігай, то ўбачылі на фотаздымках сваіх продкаў, чым былі вельмі ўражаны.
Шчырыя словы падзякі сям’і Санько ў сваім вершы выказала таксама настаўніца Ірына Осіпчык, якая нарадзілася і вырасла ў гэтай вёсцы.
Упрыгожыла свята выступленне гурта “Дзядзькі”, які выканаў песні, запісаныя ад мясцовых жанчын-спявачак.
Пасля гэтай незабыўнай сустрэчы ў сценах школы ўдзельнікі прэзентацыі разыходзіліся дадому ўзрушаныя і радасныя, бо трымалі ў руках кнігу пра сваю маленькую радзіму.
Наталля ІВАНОВА,
намеснік дырэктара школы.
