Чатыры выпускніцы Мар’інагорскай гімназіі атрымалі залатыя медалі
…Уваход на тэрыторыю Мар’інагорскай гімназіі ўпершыню за ўсю гісторыю быў закрыты для гасцей, хаця многім хацелася стаць сведкамі прыгожага дзейства, якія тут звычайна ладзіліся. Пропуск у гэтым годзе — толькі выпускнікам…
А вось яны — як звычайна: вясёлыя, узрушаныя, прыгожыя. Не дзіва ў такі асаблівы дзень развітання з бесклапотным дзяцінствам…
Сёлета гімназія выпусціла ў свет 32 свае выхаванцы. Сярод выпускнікоў ёсць і медалісты. Першыя ў жыцці ўзнагароды за працу атрымалі Валерыя Адаладава, Віялета Шавель, Дар’я Адамчанка і Ірына Мікалаева. Многім гімназістам уручылі падзячныя лісты за асаблівыя поспехі ў вывучэнні асобных прадметаў.
Сваіх вучняў шчыра віталі настаўнікі, бацькі. Жадалі самага каштоўнага ў жыцці — здароўя. І, канечне, удачы ў самастойным жыцці, якое пачалося для ўчарашніх школьнікаў з першымі сонечнымі праменнямі наступнага дня, дня пасля дзяцінства…
На гэтым тыдні ў нашым раёне са школай развітаўся 251 выпускнік.
Алена ІВАНОВА.