Добры стымул для самаўдасканалення
Маркіроўшчык СТАА «Марозпрадукт» Юлія Валента (на здымку) працуе на прадпрыемстве больш за пяць гадоў. Яна, па словах калег, — чалавек-парадак. Інакш і быць не можа, бо праца, за якую адказвае Юлія, патрабуе ад выканаўцы максімальнай засяроджанасці і ўважлівасці. Уся прадукцыя, якая выпускаецца, перш, чым адправіцца на склад і потым да спажыўца, павінна быць прамаркіравана. У інфармацыі нельга дапусціць ніякай памылкі. Усё павінна быць дакладна. З гэтым Юлія спраўляецца на выдатна. Таму не дзіўна, што яе фотаздымак размешчаны на Дошцы гонару вытворчага цэха.
Дарэчы, Дошка гонару тут адрозніваецца ад усіх тых, якія мне даводзілася бачыць раней.
— Па-першае, яна абнаўляецца штомесячна, — каментуе начальнік вытворчага цэха Сафія Рубцова. — Па-другое, лепшых мы выбіраем па намінацыях. Напрыклад, у намінацыі «Імкнуся быць абаяльнай і прывабнай» адзначаем тых, хто скрупулёзна выконвае ўсе санітарна-гігіенічныя нормы, заўсёды выглядае прыкладна. У намінацыі «Валодаю высокай самаарганізацыяй» — тых, хто добрасумленна і прафесійна выконвае свае абавязкі і, напрыклад, пры неабходнасці можа замяніць калегу на другім участку. «Лепшы навічок у сезоне» — намінацыя і для тых, хто толькі прыйшоў на прадпрыемства, і для тых, хто перайшоў на іншую пасаду.
Трэба сказаць, што работнікі завода імкнуцца працаваць так, каб быць адзначанымі за сваю працу. Тым больш, што змест Дошкі гонару цэха змяняецца штомесячна. А гэта добры стымул не толькі для самаўдасканалення, але і для таго, каб не здаваць ужо заваяваныя пазіцыі.
Алена ШАНТЫКА.