Экспедыцыя “Дарога да Святыняў” упершыню прайшла па тэрыторыі Пухавіцкага раёна
Штогод напярэдадні Дня беларускага пісьменства праводзіцца навукова—асветніцкая экспедыцыя “Дарога да Святыняў” з Жыватворчым Агнём ад Гроба Гасподняга. Сёлета экспедыцыя прайшла ў 25-ты раз, і для нас яна адметная тым, што маршрут упершыню пралягаў па тэрыторыі Пухавіцкага раёна.
Група паломнікаў накіравалася ў город Іванава Брэсцкай вобласці, дзе заўтра пройдуць асноўныя мерапрыемствы, прысвечаныя Дню беларускага пісьменства. На добры шлях удзельнікаў экспедыцыі благаславіў уладыка Веніямін, епіскап Барысаўскі і Мар’інагорскі. Адпраўной кропкай стаў Свята-Духаў кафедральны сабор у Мінску.
Экспедыцыя пачалася ў сераду раніцай. Увечары таго ж дня паломнікаў шчыра віталі на Пухавіччыне ў пасёлку Свіслач.
Удзельнікаў “Дарогі да Святыняў” сустракаў благачынны цэркваў другой Пухавіцкай раённай акругі протаіерэй Віктар Машлякевіч, старшыня Свіслацкага сельвыканкама Леанід Нечуйвіцер, святары і прыхаджане. Кіраўніку экспедыцыі Ніне Сямёнаўне Загорскай уручылі каравай. Пасля гаспадароў і гасцей аб’яднаў хросны ход. З агульнай малітвай яны прайшлі да храма Прападобнага Серафіма Сароўскага. Там таксама адбыўся малебен, які ўзначаліў настаяцель прыхода іерэй Уладзімір Машлякевіч. На свечкі прыхаджан перадалі Жыватворчы Агонь.
Пасадка “Сада Малітвы” — яшчэ адна традыцыя навукова-асветніцкай экспедыцыі. За 25 гадоў яе ўдзельнікі пасадзілі на тэрыторыі нашай краіны каля трох тысяч дрэў. Цяпер маладыя дрэўцы з’явіліся і на тэрыторыі храма Прападобнага Серафіма Сароўскага.
У Свіслацкім Доме культуры адбылася духоўна-асветніцкая канферэнцыя, на якую запрасілі жыхароў пасёлка.
У чацвер удзельнікі экспедыцыі наведалі гарадскі пасёлак Рудзенск, дзе пасадзілі «Сад Малітвы». Адбыўся хросны ход да храма Прападобнай Еўфрасінні Полацкай, які будуецца. Настаяцелю храма айцу Міхаілу Раманенкаву ўручылі копію цудадзейнай Загор’е-Сталовіцкай іконы Божай Маці. На рудзенскую зямлю перадалі Жыватворчы Агонь. Удзельнікі экспедыцыі таксама сустрэліся з калектывам ААТ “Рудзенск”.
З пухавіцкай зямлі экспедыцыя “Дарога да Святыняў” накіравалася ў Дзяржынскі раён.
Кацярына ВЕРНІКОЎСКАЯ.