Футбалісты ФК “Дынама-Мінск” сустрэліся з вучнямі Азярычынскай школы
Сапраўднае свята падаравалі вучням ДУА “Азярычынскі навучальна-педагагічны комплекс дзіцячы сад-базавая школа” футбалісты ФК “Дынама-Мінск” Максім Швяцоў і Максім Плотнікаў, якія завіталі ў гэтую навучальную ўстанову. Гэта сустрэча аказалася не менш цікавай і для настаўнікаў, і для аднавяскоўцаў.
Юныя спартсмены школы сустракалі гасцей у спартыўнай форме сіняга колеру з лагатыпам “Дынама” і надпісам “Дынама-Азярычына”.
Афіцыйная частка прайшла ў спартыўнай зале школы. Дынамаўцам было зададзена шмат пытанняў. Вучань школы Сяргей Качын, які задаў самае цікавае, на погляд гасцей, пытанне, атрымаў галоўны прыз — футбольны мяч з іх аўтографамі. Астатнія вучні атрымалі ў падарунак ад футбольнага клуба спартыўную форму і мячы.
А далей было самае цікавае: гульня ў футбол на школьным стадыёне. Прафесіяналы-футбалісты набралі сабе каманды з вучняў. У кожнай камандзе, акрамя хлопчыкаў, гулялі і дзяўчынкі, а адным з галкіпераў стаў бацька шасцікласніка — заядлы футбаліст і балельшчык Павел Качын. З лікам 2:0 перамагла каманда футбаліста Максіма Плотнікава.
І ў заключэнні— сумесны фотаздымак на памяць. Прыемныя ўспаміны ад гэтай захапляльнай сустрэчы застануцца ва ўсіх удзельнікаў на доўгі час.
Людміла БЯЛЕВІЧ,
дырэктар Азярычынскага НПК дзіцячы сад-базавая школа.