Калектыў МТФ «Блонь» падрыхтаваны да наступаючых халадоў

Зімовыя месяцы — няпросты перыяд для працы жывёлаводаў. А сёлета зіма  паспяшалася і прыйшла да нас на паўмесяца раней кліматычнай пары. Але такі сюр-прыз не застаў знянацку  калектыў малочнатаварнай фермы «Блонь» ААТ «Індустрыя-СГ», бо да зімоўкі тут падрыхтаваліся загадзя.

На ферме пяць памяшканняў, дзе ўтрымліваецца буйная рагатая жывёла, і чатыры з маладняком. Тут зрабілі санітарную апрацоўку, пабялілі памяшканні, замянілі вокны, уцяплілі дзверы.

Жывёлавод Алег Шчамялёў, загадчыца МТФ «Блонь» Вольга Мялешка, слесар Уладзімір Булыга, аператар па дарошчванні цялят Іна Радкевіч.

Ферма «Блонь» — самая вялікая ў гаспадарцы:  1715  галоў  буйной  рагатай  жывёлы. Год  таму  калектыў  фермы ўзначаліла  Вольга  Мялешка.

— Калі я перайшла сюды з фермы    «Пухавічы», малака атрымлівалі на 30 тон менш, чым  сёння,  —  успамінае  загадчыца. — Мы адразу ўзяліся за працоўную дысцыпліну, ад якой залежыць палова поспеху. Перагледзелі ўмовы ўтрымання і рацыён харчавання жывёл. І вынік не прымусіў сябе доўга чакаць.

З пачатку года на МТФ «Блонь» атрымалі на 80 тон малака больш, чым у мінулым годзе. Да таго ж, адпраўляюць яго на перапрацоўчыя заводы амаль 100 працэнтаў гатункам «экстра». Гэта вельмі добры паказчык не толькі ў гаспадарцы, але і ў раёне. Сочаць за якасцю малака загадчыца фермы і ветэрынарны ўрач. Дабіваюцца такога выніку дзякуючы правільнаму даенню, збалансаванаму рацыёну, ветэрынарным мерапрыемствам.

Штодня з фермы адпраўляюць 7 тон  малака на ААТ «Слуцкі  сыраробны  камбінат».

— Сёння рацыён кармлення нашых кароў складаецца з кормасумесяў, якія мы самі вырабляем, — адзначае Вольга Гена-дзьеўна. — Гэта неабходныя для жывёл канцэнтраты, жом, сілас, сянаж, кармавыя дабаўкі. Калі казаць аб нованароджаных цялятах, то  для іх  дадаткова даюць па схеме выпойвання кармавыя дабаўкі  КДК-1. І  адразу  відаць  вынік.  Цяляткі  здаровыя  і ўпэўнена набіраюць вагу.

Яшчэ адзін фактар, які ўплывае на вялікае малако, —  здаровая прадуктыўная жывёла. Галоўны ветурач Ганна Навіцкая пільна сочыць за своечасовай вакцынацыяй, лячэннем жывёлы, праводзіць прафілактычныя работы з маладняком.

Аператары машыннага даення Алена Валавік, Святлана  Няборская, Генадзь  Няборскі і Наталля Ларкова паказваюць найлепшыя вынікі ў атрыманні малака.

Сёння надой на адну карову ў суткі складае 12,3 кілаграма малака, што на 3 кілаграмы  больш чым летась. Дзякуючы правільнаму догляду і добрым умовам утрымання растуць і прыбаўленні ў вазе. Адзін з найлепшых паказчыкаў — у групе Іны Радкевіч, якая даглядае цялят з нараджэння і да трох месяцаў.  Цяпер  у  яе  групе  прыбаўленні ў вазе  складаюць 670 грамаў у суткі.

Вольга Мялешка з задавальненнем паведаміла: каб аблегчыць працу даглядчыкаў, гаспадарка набыла сучасны кормараздатчык. Так што зараз разумная тэхніка, якой кіруе адзін чалавек, за некалькі хвілін напаўняе кармавыя сталы ўсіх пяці памяшканняў.

Анастасія  ПЛЯТНЁВА.