Каманда па корманарыхтоўцы СВФ “Дрычын” — у ліку перадавікоў раёна
У гаспадарках раёна актыўна працягваецца кормаўборачная кампанія. Перад аграрыямі стаіць задача своечасова нарыхтаваць якасныя кармы. Першым укосам плануецца скасіць 13 473 гектары. На раніцу аўторка скошана больш за 9600 гектараў. З гэтым паказчыкам земляробы Пухавіччыны — адны з лідараў Мінскай вобласці. Наперадзе толькі работнікі сельгасарганізацый з Дзяржынскага, Капыльскага, Нясвіжскага, Слуцкага і Салігорскага раёнаў.
Каманда па корманарыхтоўцы СВФ “Дрычын” разам з калектывамі ААТ “Зазерка”, “Голацк”, “Агра-Абярэг” і СУП “Дукора-Агра” ўваходзіць у спіс перадавікоў раёна. Першым укосам у сельгасфіліяле планавалі скасіць 643 гектары. План ужо перавыканалі больш чым на 100 гектараў.
На трамбоўцы зялёнай масы працуюць Дзмітрый Філонаў і Анатолій Молчан.
— Першым укосам мы задаволены. Люцэрна, канюшына, кастрэц і злакавыя травы ўрадзілі нядрэнна. Пра ўраджай клапаціліся загадзя: вясной пад бабовыя расліны ўносілі калійныя ўдабрэнні, пад злакі — азот, — адзначае галоўны аграном Галіна Сіпач.
Скошаную траву кансервуюць рознымі метадамі. 110 тон сенажу Сяргей Прачкоўскі ўжо абгарнуў у стрэйч-плёнку. Большую частку зялёнага корму назапашваюць традыцыйным спосабам — у сянажную траншэю.
Механізатар Уладзімір Забаўскі.
Вадзіцель Яўген Давыдаў.
Першую траншэю на 1000 тон заклалі каля МТК “Новае Сяло”. Цяпер работа вядзецца каля малочнатаварнай фермы “Калінаўка”. На полі ў 80 гектараў задзейнічана асноўная тэхніка гаспадаркі. Уладзімір Шыманскі працаваў з касілкай, услед за ім выязджаў Мікалай Гулякевіч з граблямі. Першы сезон на КВК-800 зялёную масу здрабняе Уладзімір Забаўскі, на “Джон Дзіры” — Дзмітрый Маркевіч.
Вадзіцель Аляксандр Кролік.
На адвозцы зялёнай масы працуе ўнушальны дэсант. Вадзіцелям Дзмітрыю Мялешку, Яўгену Давыдаву, Сяргею Прачкоўскаму дапамагае Сяргей Голуб з ААТ “Мінскі малочны завод №1”. На перыяд корманарыхтоўкі ў якасці вадзіцеляў у сельгасфіліял камандзіраваны таксама Аляксандр Кролік, Сяргей Данека і Алег Шафіраў з ДУП “Пухавіцкае ПМС”.
У панядзелак у сельгасфіліяле завяршылі закладваць сянажную траншэю на 2000 тон. З гэтай задачай справіліся за лічаныя дні: у дзень у гаспадарцы ў сярэднім закладваюць каля 700 тон зялёнай масы. За яе вільготнасцю і тэмпературай сочыць ветэрынарная служба гаспадаркі. Пастаянна кантралююць увесь працэс і аграномы.
— Днём, калі зялёнка пастаянна паступае ў траншэю, на трамбоўцы адначасова працуюць Анатолій Молчан і Дзмітрый Філонаў. Ноччу спраўляемся адной адзінкай тэхнікі, — працягвае галоўны аграном. — Усе добра разумеюць: першую сакавітую траву трэба паспець скасіць у аптымальныя тэрміны. Таму ў полі працуем з самай раніцы да вечара.
Задача для дрычынскіх аграрыяў на бягучы год — нарыхтаваць 9900 тон сенажу. Дастатковы запас кармоў для любой гаспадаркі — своеасаблівая інвестыцыя ва ўласную эканоміку.
Кацярына ВЕРНІКОЎСКАЯ.
