Міжнародны дзень роднай мовы адзначылі ў Мар’інагорскай гарадской бібліятэцы
Беларускае слова — гэта своеасаблівы рознакаляровы свет, які мы спасцігаем і сэрцам, і розумам. Супрацоўнікі Мар’інагорскай гарадской бібліятэкі кожны раз з таямнічай радасцю і хваляваннем чакаюць 21 лютага — Міжнародны дзень роднай мовы. У гэтым годзе бібліятэкары падрыхтавалі прэзент–акцыю ў падтрымку беларускай кнігі і чытання “Цудоўны храм жывога слова”, якая ўзяла старт 15 лютага і будзе працягвацца да канца года.
У межах акцыі было арганізавана шмат цікавых мерапрыемстваў, якія дазволілі загучаць роднай мове ярка, меладычна і лёгка. Напрыклад, праходзіла літаратурна-паэтычная праграма “Бліц Ліц” — сапраўднае свята паэзіі. Гэта адначасова фотавы-става партрэтаў беларускіх паэтаў і паэтычны марафон, дзе ў выкананні дзяцей і моладзі гучалі іх вершы.
Для юных сяброў бібліятэкі — выхаванцаў “SOS-Дзіцячая вёска” і другіх актыўных чытачоў была падрыхтавана квіз-гульня “Бясцэнны духоўны скарб”, падчас якой дзве каманды адправіліся ў цікавае падарожжа па краіне беларускага слова. Кожны прыпынак падарожжа — гэта шэраг цікавых творчых заданняў. Так, у “Смачнай лаўцы” ўдзельнікаў гульні чакаў аўкцыён: каб атрымаць смачны і карысны прадукт харчавання, трэба было назваць, як ён гучыць па-беларуску. У “Аграсядзібе” дзеці пазнаёміліся з культурай і бытам беларускага народа ў мінулым. Школьнікі з вялікім натхненнем збіралі беларускія народныя назвы рэчаў быту: посуд, адзенне, прылады працы і іншыя.
Прыпынак “Літаратурная старонка” запрасіў прысутных на фотавыставу, дзе неабходна было скласці пазл з выявай пісьменніка, сабраць карткі з імёнамі і прозвішчамі паэтаў.
Эстафету жывога, мілагучнага беларускага слова падтрымалі і навучэнцы пачатковай школы Мар’інагорскай гімназіі. Кніжны дамавік Сымон запрасіў іх у “Салодкую казку”. Смачныя словы, смачная рухомая гульня “Калабок” і смачная народная казка “Пшанічны каласок” — такія дзівосы чакалі дзетак.
На дарослым абанеменце для чытачоў прайшла літаратурная гульня “Прадоўжы думку з пісьменнікам”, у ходзе якой чытачы ў займальнай форме знаёміліся з творамі сучасных беларускіх пісьменнікаў.
На дзіцячым абанеменце працуе інтэрактыўная пляцоўка “Сучаснае маўленне новага пакалення”. Гуляючы, дзеці знаёмяцця з неалагізмамі, фразеалагізмамі і дыялектызмамі.
Прыгожай меладычнай старонкай акцыі стала пасяджэнне “Клуба цікавых сустрэч”, прысвечанае песеннаму багаццю Беларусі. Удзельніцы клуба пазнаёміліся з творчасцю нашых таленавітых кампазітараў і паэтаў, а таксама з вялікай асалодай праспявалі вядомыя беларускія песні “Спадчына”, “Мой родны кут”, “Полька-весялуха” і іншыя.
Наша родная мова — вельмі прыгожая і мілагучная. Яна нібы спеў салаўя, нібы звон капелі ранняй вясной… Пад небам беларускага слова нам утульна, цёпла і весела.
Вікторыя БУРЛАЧЭНКА,
загадчыца Мар’інагорскай гарадской бібліятэкі.
