«Папярэдне — скорасны рэжым вадзіцелямі не парушаўся». Кубракоў аб ДТЗ у Смалявіцкім раёне
Папярэдне — скорасны рэжым вадзіцелямі не парушаўся, заявіў журналістам міністр унутраных спраў Іван Кубракоў, перадае карэспандэнт БЕЛТА.
«Цяпер яшчэ працуе следча-аператыўная група. Устанаўліваем усе прычыны, якія садзейнічалі гэтаму ДТЗ. Сказаць, хто вінаваты, хто мае рацыю, у гэты момант не магу. Таму што будзе праводзіцца вельмі вялікая колькасць экспертыз. Пытанняў сапраўды шмат. Папярэдне — скорасны рэжым вадзіцелямі не парушаўся», — сказаў Іван Кубракоў.
20 лютага каля 15.00 на трасе Р69 паблізу Смалявіч адбылося лабавое сутыкненне маршруткі і гружанага МАЗа. У аварыі загінулі вадзіцель маршруткі і дзесяць пасажыраў, у тым ліку дзіця.
Яшчэ дзевяць пацыентаў з траўмамі рознай ступені цяжкасці былі дастаўлены ў Смалявіцкую ЦРБ. Шасцёра пацыентаў — у цяжкім стане, яшчэ трое — з траўмамі сярэдняй ступені цяжкасці. Дапамогу пацярпелым аказвала брыгада спецыялістаў як Смалявіцкай ЦРБ, так і Мінскай абласной клінічнай бальніцы. Акрамя таго, у Смалявічы прыбылі спецыялісты з двух РНПЦ — неўралогіі і нейрахірургіі і траўматалогіі і артапедыі.
Пасля стабілізацыі стану пяць пацыентаў былі перавезены ў абласную бальніцу, трое — у Цэнтр спалучанай траўмы БХМД, дзяўчынка — у РНПЦ дзіцячай хірургіі.
На месцы ДТЗ працавалі следчыя абласнога ўпраўлення і цэнтральнага апарата СК з прыцягненнем спецыялістаў ДКСЭ і супрацоўнікаў ДАІ.
Узбуджана крымінальная справа па ч.3 арт.317 (парушэнне правіл дарожнага руху, што прывяло па неасцярожнасці да смерці дзвюх і больш асоб) КК Беларусі.
