Пасяўная кампанія — галоўная тэма земляробаў
Дырэктар ААТ «Зазерка» Андрэй Папельскі і механізатар Аляксей Вераскоўскі.
У сярэдзіне тыдня большасць гаспадарак раёна прыступілі да сяўбы. Актыўна ўключыліся ў пасяўную кампанію земляробы ААТ “Зазерка”. Да работы былі падрыхтаваны тры пасяўныя агрэгаты. Першым у аўторак на поле выехаў Аляксей Вераскоўскі. Пазней да яго далучыліся Мікалай Кушпет і Алег Зяньковіч. 958 гектараў яравых збожжавых і зернебабовых культур у гаспадарцы плануюць пасеяць да канца наступнага тыдня. На раніцу пятніцы было засеяна 8 працэнтаў плошчы.
Сяўбу сёлета пачалі з яравога трыцікале. Гэту культуру сеялі на сяргеевіцкіх землях. Там глебы больш лёгкія, чым каля Зазеркі, таму крыху раней дазволілі тэхніцы выйсці на палі. Там мы і сустрэліся з Аляксеем Вераскоўскім. На магутным “Джон Дзіры” з італьянскай сеялкай “Фогель Нут” ён працуе ўжо 12 гадоў. Гледзячы на акуратную дагледжаную тэхніку, я, прызнаюся, у гэтыя лічбы верыла з цяжкасцю.
— Усё таму, што тэхніка ў руках гаспадара, — гаворыць дырэктар гаспадаркі Андрэй Папельскі. — Аляксей Вераскоўскі ўсё жыцце працуе ў сельскай гаспадарцы. Ён традыцыйна адзін з нашых лепшых сейбітаў. Зараз Аляксей Фёдаравіч працуе ў звяне з Віктарам Нехвядовічам, які падвозіць насенне.
Вадзіцель Віктар Нехвядовіч.
Вясна сёлета позняя, таму ўсе палявыя работы павінны быць праведзены ў сціслыя тэрміны. Марнаваць час земляробы не могуць. Іх задача — прыкласці максімум намаганняў, каб атрымаць добры вынік.
На палях ААТ “Зазерка” кіпіць работа. Загадзя агранамічная служба прадумала севазварот. Сейбіты прыязджаюць на гатовыя палі, дзе напярэдадні на ўнясенні мінеральных удабрэнняў і падрыхтоўцы глебы працавалі Сяргей Шчэрба, Пётр Юркевіч, Аляксандр Прыгодскі, Павел Навічыхін, Канстанцін Максімчык.
— Зараз такая пара, што мы адначасова выконваем некалькі відаў работ, — працягвае Андрэй Станіслававіч. — Завяршаем першую падкормку азімых. Хутка Віктар Бурак, Пётр Юркевіч, Сяргей Дароўскі і ўсё, хто былі задзейнічаны на гэтых работах, выйдуць у поле з іншымі агрэгатамі. Таксама ўжо займаемся ўнясеннем арганікі пад кукурузу. У канцы красавіка на 150 гектарах будзем сеяць цукровыя буракі. Землі цалкам падрыхтавалі. Ёсць і свая сеялка, з якой будзе працаваць Алег Зяньковіч.
Пасяўная кампанія — галоўная тэма ў земляробаў. Арганізацыйныя пытанні вырашаны: з уласнай сталовай наладжана дастаўка абедаў на палі, на сходзе былі аб’яўлены ўмовы спаборніцтва, інфармацыя пра заробак і норма-змены на розных відах работ. Працоўны дзень у земляробаў цяпер пачынаецца з шасці гадзін раніцы. Але працаўнікам гаспадаркі, якія штогод трапляюць у спіс перадавікоў, не прывыкаць да такога напружанага графіка работы.
Кацярына ВЕРНІКОЎСКАЯ.
