Пухавіччане прадстаўлялі Беларусь на міжнародным фестывалі ў Латвіі

Народны сямейны ансамбль “Жывіца” Борскага сельскага Дома культуры  прадстаўляў Беларусь на ХХІІ Міжнародным фальклорным фестывалі “Lustes Jekabpili”, што праходзіў у Латвіі. Музычны форум традыцыйна збірае творчыя калектывы краін Балтыі. Беларускія артысты сярод яго ўдзельнікаў былі ўпершыню.

Запрашэнне для “Жывіцы” даслаў латвійскі бок. З творчасцю калектыва арганізатары фестывалю пазнаёміліся праз інтэрнэт. Пухавіччане арганічна ўпісаліся ў агульную канву музычнага свята.   І ў выніку атрымалі не толькі ўзнагароды фестывалю, а яшчэ і запрашэнне прыняць удзел у Днях беларускай культуры ў Латвіі, якія адбудуцца ў верасні гэтага года. Чакаюць “Жывіцу” ў балтыйскай краіне таксама  на двух музычных форумах, што пройдуць у маі і ліпені  наступнага года.

Наталля   ПАРХОМЧЫК.