Раённы савет ветэранаў правёў конкурс «Бабуліны прысмакі»
Таццяна Самойленка.
Напярэдадні Дня жанчын раённым саветам ветэранаў быў праведзены кулінарны конкурс «Бабуліны прысмакі». Асноўная мэта гэтага мерапрыемства — абмен вопытам і папулярызацыя кулінарнага мастацтва, выяўленне таленавітых кулінараў і кандытараў сярод ветэранаў працы.
Вельмі прыемна, што падчас падрыхтоўкі да конкурсу Пухавіцкі раённы савет ветэранаў падтрымалі старшыня раённага аб’яднання прафсаюзаў Людміла Гулякевіч, старшыні раённых грамадскіх арганізацый «Беларускі саюз жанчын» Людміла Сарнова, «Беларускае таварыства інвалідаў» Якаў Арончык, «Беларускае таварыства «Веды» Наталля Бародзька.
Падвядзенне вынікаў конкурсу «Бабуліны прысмакі» прайшло на базе цэнтральнай раённай бібліятэкі. Нашы цудоўныя, таленавітыя жанчыны сабраліся за святочным сталом, які ўпрыгожвалі пірагі, торты, бліны з самымі разнастайнымі начынкамі. Вершы, прымаўкі, прыпеўкі гучалі на прэзентацыі кулінарных шэдэўраў. Усе прысутныя змаглі ацаніць смак конкурсных вырабаў.
Першае месца па рашэнні журы заняла ветэран працы Таццяна Самойленка, прызёрамі сталі Яніна Баюр і Ніна Гайдукевіч. Усе астатнія ўдзельніцы атрымалі памятныя прызы.
Нашы ветэраны ў чарговы раз даказалі, што нягледзячы на ўзрост, яны могуць і ўмеюць многае.
Ператварыць конкурс у сапраўднае свята раённаму савету ветэранаў дапамаглі дырэктар ЗАТ «Пухавіцкі аграпрадукт» Іван Гумоўскі, кіраўнік ТДА «Бацькоўская спадчына» Вячаслаў Дзярушка, дырэктар сярэдняй школы №2 горада Мар’іна Горка Дзіна Паўлава.
Ганна САБАЛЕЎСКАЯ,
старшыня раённага савета ветэранаў.
