Шмат гасцей наведалі сацыяльны прытулак у Дубраўцы падчас акцыі «Нашы дзеці»
Падчас акцыі “Нашы дзеці” асаблівая ўвага ўдзяляецца хлопчыкам і дзяўчынкам, якія апынуліся ў складаных жыццёвых абставінах. Таму шмат гасцей у святочныя дні бывае ў інтэрнатных установах, прытулках, дзе дарослыя імкнуцца зрабіць так, каб усе нягоды іх маленькіх выхаванцаў хутчэй сталі ўспамінамі.
Амаль штодня падчас правядзення акцыі сустракалі гасцей з падарункамі і ў дзіцячым сацыяльным прытулку раённага сацыяльна-педагагічнага цэнтра, што знаходзіцца ў Дубраўцы. У госці да выхаванцаў завіталі ваеннаслужачыя в/ч 89417 і парадавалі ўсіх казкай, якую сачынілі і паставілі самі. З падарункамі завіталі сюды і прадстаўнікі раённага ваеннага камісарыята. У святочныя дні пабывалі ў прытулку добрыя сябры — члены пошукава-выратавальнага атрада “Анёл”. Наведалі выхаванцаў вучні сярэдняй школы №4 горада Мар’іна Горка, члены піянерскай арганізацыі раёна, бацькі вучняў сярэдняй школы №2 горада Мар’іна Горка. На галоўны святочны ранішнік з падарункамі прыехалі пастаянныя шэфы — прадстаўнікі дзяржаўнага знешнегандлёвага ўнітарнага прадпрыемства “Белспецзнештэхніка”, суддзя Мінскага абласнога суда Анастасія Куль-біцкая і памочнік старшыні суда Пухавіцкага раёна Арыся Ганжына, старшыня Мінскага абласнога прафсаюза работнікаў энергетыкі, газавай і паліўнай прамысловасці Валерый Балкіс. Павіншавала са святам педагогаў і выхаванцаў старшыня раённага камітэта прафсаюза работнікаў адукацыі і навукі Таццяна Шавель. Прыемным стаў і візіт прадстаўнікоў Цэнтра банкаўскіх паслуг №626/аперацыйнай службы ААТ “Беларусбанк”.
Наталля ПАРХОМЧЫК.