Створым разам краязнаўчую фактаграфічную базу дадзеных гастранамічнага турызму, у якой жыхары раёна і турысты знойдуць звесткі аб кулінарных брэндах нашага раёна
Культуру народа можна спазнаваць не толькі ў музеях і па помніках архітэктуры. Не так даўно ўзнік новы напрамак — гастранамічны турызм. Ён выкарыстоўвае нацыянальную кухню як адзін з рэсурсаў, які дазваляе раскрыць асаблівасці гістарычнага развіцця і ўкладу жыцця краіны.
Беларуская кухня мае свае характэрныя асаблівасці, якія выдзяляюць яе сярод кулінарных традыцый іншых краін. Яна падобна да рускай, украінскай, літоўскай і польскай, але па-свойму ўнікальная. І, вядома ж, смачная і сытная, з прычыны чаго гастранамічны турызм і гастратуры набіраюць усё большую папулярнасць і ў Беларусі.
Кулінарнае мастацтва заўсёды было цесна звязана з побытам, культурай, звычаямі народа. Нацыянальныя стравы — гэта культурная з’ява, якая раскрывае традыцыі, сацыяльны статус і лад жыцця беларусаў. Гэта наша ўнікальная беларуская гісторыя, якую неабходна не толькі ведаць, але і захаваць, зберагчы, данесці да будучага пакалення.
З мэтай сфарміраваць вядомы гастранамічны брэнд Пухавіцкага раёна, які будзе адлюстроўваць не толькі характэрныя асаблівасці горада і раёна, але і падкрэсліваць яго багатую культурную і гістарычную спадчыну, Пухавіцкай цэнтральнай раённай бібліятэкай распрацаваны праект па гастранамічным турызме ў рэгіёне «Дзе каша і аладка — там будзе і грамадка».
У рамках праекта запланавана шмат мерапрыемстваў, прысвечаных беларускай кухні: гадзіннік этнаграфіі, літаратурна-кулінарныя конкурсы, гістарычныя экскурсы, віртуальныя экскурсіі і г.д.
— Нас падштурхнулі да стварэння гэтага праекту творы класікаў беларускай літаратуры Якуба Коласа, Янкі Купалы, Рыгора Барадуліна, Адама Міцкевіча, Уладзіміра Караткевіча, у якіх ёсць апісанні беларускіх абрадаў і старажытныя рэцэпты прыгатавання, — расказвае кіраўнік праекта, загадчыца аддзела абслугоўвання і інфармацыі Пухавіцкай цэнтральнай раённай бібліятэкі Таццяна Александровіч. — Мы хочам стварыць краязнаўчую фактаграфічную базу дадзеных гастранамічнага турызму, у якой жыхары раёна і турысты знойдуць звесткі аб кулінарных брэндах нашага раёна, аграсядзібах і экапарках, дзе можна пакаштаваць стравы беларускай кухні. Асобны раздзел будзе прысвечаны аўтэнтычным рэцэптам беларускай кухні, па якіх гатавалі нашы бабулі, мамы, а зараз і мы гэтыя стравы з задавальненнем гатуем для сваіх родных і блізкіх. Таму мы звяртаемся да ўсіх жыхароў раёна з просьбай:
Калі ў вашай сям’і захаваліся старадаўнія рэцэпты ад вашых бабуль, прабабуль, і вы хочаце падзяліцца імі, — звяртайцеся ў ДУК «Пухавіцкая раённая цэнтральная бібліятэка» па e-mail: mgbiblioteka@yandex.ru альбо па тэлефоне: 3-44-46.
Алеся ГВАРДЗІЯН.