Сяргей і Святлана Гуцу разам са школы і са школай
Сказаць, што ў гэтых людзей шмат агульнага, — будзе занадта сціпла. Сяргей Аляксандравіч і Святлана Аляксандраўна Гуцу жартуюць, што ў іх, акрамя прозвішча, нават ініцыялы аднолькавыя. Але гэта здарылася ўжо тады, калі педагогі стварылі сям’ю. Да гэтага яны проста былі аднакласнікамі…
Цяпер жа Сяргей Аляксандравіч і Святлана Аляксандраўна — калегі. І зноў школа ў іх адна на дваіх: абодва працуюць у Пярэжырскай СШ імя Адама Гурыновіча. Сяргей Аляксандравіч (гісторык па прафесіі) — дырэктар. Святлана Аляксандраўна — настаўнік беларускай мовы і літаратуры.
— Пасля размеркавання мы пачыналі працоўны шлях на Гомельшчыне, — расказвае Сяргей Гуцу. — Аднак лёс склаўся так, што пераехалі ў Пухавіцкі раён. Тут я ўзначаліў Пярэжырскую школу, а Святлана Аляксандраўна перайшла сюды, як толькі з’явілася вакансія педагога. Першыя два гады жылі на кватэры пры школе. Нават жартавалі: усёй сям’ёй па 24 гадзіны ў суткі не пакідаем школу. Потым атрымалі ўласнае жыллё. І вось ужо 13 гадоў працуем тут, у Пярэжыры.
Сяргей Аляксандравіч вырашыў для сябе сканцэнтраваць увагу на выкананні адміністратыўных абавязкаў, каб заўсёды мець вольны час для рашэння гаспадарчых праблем, пытанняў падвозу дзяцей з другіх вёсак, для кантактаў з бацькамі. І лічыць, што зрабіў правільна.
А вось Святлана Аляксандраўна цалкам прысвяціла сябе рабоце з дзецьмі, навучанню іх роднай мове. Аб рэзультатах настаўніцкай працы яскрава сведчаць поспехі вучняў. Яны сваю настаўніцу не падводзяць: апошнія гады школьнікі з Пярэжыра становяцца пераможцамі раённых алімпіяд па беларускай мове і нават аднойчы адбіраліся на вобласць, а выпускнікі пішуць цэнтралізаванае тэсціраванне на самыя высокія балы. Дар’я Бузук, напрыклад, здала тэсты на 96 балаў. Сёння вучыцца на факультэце журналістыкі. У гэтым годзе самы высокі “беларускі” рэзультат па школе быў 88 балаў. Не сорамна за такую падрыхтоўку.
Сяргей Аляксандравіч і Святлана Аляксандраўна за гэты час, па іх словах, вельмі палюбілі і школу, і калектыў, у якім працуюць, і мясцовасць, дзе жывуць. Ганарацца тым, што іх школа — не проста сельская ўстанова адукацыі, а школа з цікавай гісторыяй, з традыцыямі, якія працягваюцца і зараз дзякуючы супрацоўніцтву з Міністэрствам замежных спраў Беларусі і сувязям з Японіяй.
— На сённяшні дзень у школе навучаецца 197 дзетак, — кажа Сяргей Гуцу. — І мы працуем для таго, каб нашы выпускнікі не проста знаходзілі сваё месца ў жыцці, а давалі нагоду, каб імі ганарылася малая радзіма.
Алена ІВАНОВА.