Традыцыйна праводзяць суботнікі па ўборцы замацаваных за прадпрыемствам тэрыторый работнікі філіяла «ЦЭЦ-5» РУП «Мінскэнерга»
— Мы стараемся ўтрымліваць у парадку не толькі тэрыторыю нашага прадпрыемства, якая па плошчы, мабыць, адна з самых вялікіх вытворчых плошчаў у раёне, але таксама сочым за парадкам у пасёлку Дружны і пастаянна прыбіраем веладарожку, якая вядзе да возера Мацярынскае, і тэрыторыю каля сажалкі-ахаладжальніка, — расказвае спецыяліст па сувязях з грамадскасцю Наталля Капаева. — На мінулым тыдні ў рамках восеньскага месячніка па навядзенні парадку на зямлі мы зноў выйшлі на звыклыя маршруты. Было сабрана ў чарговы раз нямала бытавога смецця, пластыкавай тары і іншых рэчаў.
Энергетыкі прызнаюцца, што пасля такіх суботнікаў заўсёды застаецца дваякае пачуццё: з аднаго боку, прыемна, што бачны вынік працы, а з другога — крыўдна, што работы па навядзенні парадку ніяк не становіцца менш. Людзі як выкідвалі смецце дзе прыйдзецца, так і працягваюць смеціць. Увосень працаўнікі філіяла прыбіраюць за адпачываючымі каля вады, а ўвесну — за тымі, хто ловіць рыбу ў сажалцы. Нікому не становіцца сорамна ад таго, што дзясяткі людзей аддаюць свой час і сілы для таго, каб прыбіраць за кімсьці выкінутае ў неналежных месцах смецце.
На жаль, даводзіцца прызнаць: не будзь гэтага энтузіязму, за некалькі гадоў мы проста загразлі б у кучах усяго таго, чым бессаромна засмечваем навакольнае асяроддзе…
Алена ІВАНОВА.