У Дружным на месцы былога парку атракцыёнаў з’явіцца парк адпачынку
Тэрыторыя былога парку атракцыёнаў у пасёлку Дружны, якія знаходзіліся раней на балансе філіяла ЦЭЦ-5 РУП «Мінскэнерга», у апошнія гады, скажам прама, выглядала сумна: месца, трэба зазначыць, вельмі ўдалае (цэнтр пасёлка), а не выкарыстоўваецца, зарастае…
Але сёлета на гэтую пляцоўку прыйшлі работнікі адразу некалькіх арганізацый, каб пачаць рэалізацыю праекта па стварэнні тут зоны адпачынку для жыхароў пасёлка.
Энергетыкі спачатку разабралі і вывезлі старыя атракцыёны. Камунальнікі УП «Жылцепласэрвіс» КГ прыводзілі тэрыторыю ў парадак (выкошвалі траву, рамантавалі тратуарную плітку, фарбавалі агароджу, усталёўвалі малыя архітэктурныя формы).
Падрадная арганізацыя выканала асфальтаванне дарожак для катання на роліках, скейтах, веласіпедах.
Затым была абсталявана зона для пляжнага валейболу і пабудавана поле для міні-футболу са штучным пакрыццём.
Работы па стварэнні парку адпачынку яшчэ не завершаны, але ўжо прама сёння настрой у любога чалавека, што праязджае міма, думаю, не сапсуецца.
— У перспектыве ў парку мы плануем зрабіць варкаўт-пляцоўку, дзе любы жадаючы зможа заняцца фізічнай культурай на трэнажорах, усталяваць дзіцячы гульнявы комплекс, — расказвае Іна Гуз, начальнік участка «Дружны і Свіслач». — З’явяцца тут і новыя дрэвы, кветнікі, лаўкі. І дружненцы, напэўна, палюбяць адноўлены парк. Нам бы гэтага вельмі хацелася. Як і таго, каб жыхары беражліва ставіліся да зробленага.
Апошнія словы Інай Уладзіміраўнай былі сказаны не выпадкова. Справа ў тым, што на нядаўна пакладзеным пакрыцці выдатнага футбольнага поля з’явіліся сляды падпалаў. Такія праявы вандалізму не могуць пакінуць абыякавымі людзей, якія ствараюць нешта патрэбнае і карыснае, укладваюць сродкі і працу для таго, каб дзеці, падлеткі і дарослыя маглі заняцца спортам у добрых умовах. І я, калі шчыра, ніколі не зразумею, адкуль у людзей бярэцца жаданне бурыць тое, што зроблена на карысць?!
Алена ІВАНОВА.