Да 1 ліпеня ўсе збожжаўборачныя камбайны ў раёне павінны быць на лінейцы гатоўнасці
Толькі нядаўна, здаецца, была пастаўлена кропка ў веснавой сяўбе, як ужо не за гарамі ўборка ўра-джаю. На палях наліваецца цяжкі колас, а ў сельгасарганізацыях тым часам ідзе падрыхтоўка да жніва.
Да 1 ліпеня ўсе збожжаўборачныя камбайны павінны быць на лінейцы гатоўнасці.
У КСУП “Голацк” убіраць ураджай будзе сем камбайнаў як імпартнай, так і айчыннай вытворчасці.
— Тэхніку да жніва мы пачалі рыхтаваць з пачатку лета, — расказаў намеснік дырэктара КСУП “Голацк” Аляксандр Лешчанка. — Спачатку знялі яе з захоўвання, загадзя закупілі запасныя часткі. З-за санкцый на некаторыя з іх значна выраслі цэны, таму імкнемся выкарыстоўваць любую магчымасць аднаўляць старыя запчасткі ў спецыялізаваных арганізацыях. Ёсць, вядома, складаныя і дарагія рамонты, бо магутная тэхніка эксплуатуецца шмат гадоў. А нагрузка на кожны камбайн складзе больш за 400 гектараў.
Дзмітрый Прохарчык і Міхаіл Прохарчык рамантуюць зараз “Дон-1500Б”, Мікалай Тарасевіч — “Лексіён-580”. Складаны рамонт вядзе Уладзімір Камароў, які мяняе жняяркі на камбайне “Лексіён-570”.
Акрамя камбайнаў, будзе працаваць трактар “Беларус-3022” з прэсам ППРА-155 і пяць трактароў “Беларус” з прэсамі ПРФ-180 на прэсаванні саломы. А таксама сем машын задзейнічаюць на адвозцы збожжа, саломы. Яшчэ адна машына будзе перавозіць збожжа на зернесушыльным комплексе.
У гаспадарцы кожны адказвае за замацаваную тэхніку. Усе механізатары — вопытныя. У кожнага камбайнёра за плячыма не адно жніво. Напрыклад, Аляксандр Чарнашэй працуе ў Голацку з 1989 года. Ён памятае яшчэ часы, калі ўбіраў ураджай з поля на камбайне “Ніва”. Гэтымі днямі ён рыхтуе да жніва “Дон-1500Б”. На ім камбайнер будзе малаціць збожжа ўжо 11 сезон.
— Працы нямала, — кажа Аляксандр Віктаравіч. — Аднак я ведаю ў камбайне амаль усе вузлы, таму спраўляюся з рамонтам. Жніво чакаю, бо гэта вельмі добрая пара. У мінулым годзе ўбіраў ураджай разам з сынам Сяргеем. Намалацілі 1200 тон збожжа. І нават быў удастоены гонару пабываць на свяце хлебаробаў — абласных “Дажынках” у Капылі. Спадзяюся, што і сёлета зямелька наша аддзячыць ураджаем.
Анастасія ПЛЯТНЁВА