У сельскагаспадарчых арганізацыях раёна касавіца набірае абароты
Першы ўкос шматгадовай травы, як вядома, толькі пачатковы этап нарыхтоўкі кармоў, якая будзе працягвацца да глыбокай восені. Але разам з тым ён і самы ўраджайны. Цяпер травы падышлі ў развіцці да аптымальнай фазы для ўборкі, і таму аграрыі імкнуцца не ўпусціць магчымасці ўбраць іх. Да таго ж, нават нябесная канцылярыя спрыяе выкананню гэтай важнай сельскагаспадарчай кампаніі.
“Зялёнае” жніво ў КСУП «Шацк» сёлета пачалося з уборкі азімай свірэпіцы, якая падышла да ўборкі першай. Яна займала ў гаспадарцы 64 гектары. Выкарыстоўвалі свірэпіцу на корм жывёле, прычым не толькі свайму пагалоўю, але і падтрымалі сакавітымі зялёнымі кармамі жывёлу суседніх гаспадарках. Каб поле не гуляла і была магчымасць атрымаць два ўраджаі, гектары, якія вызваліліся ад свірэпіцы, засеялі кукурузай.
У сельгасарганізацыі адно з самых вялікіх пагалоўяў буйной рагатай жывёлы — 3500 галоў, таму і нарыхтаваць кармоў трэба шмат. Плануецца атрымаць каля 30 цэнтнераў кармавых адзінак травяных кармоў разам з кукурузай на ўмоўную галаву. Першым укосам неабходна скасіць 1250 гектараў бабова-злакавай шматгадовай травы, закласці пяць траншэй.
Першую траншэю заклалі на МТК «Бор». Працэс нарыхтоўкі пастаянна кантралююць ветэрынарны ўрач і галоўны аграном.
З новай касой з 9-метровым захопам, якую сёлета набылі, працуе Анатоль Лабанок. У дзень пры заданні 39 гектараў ён скошвае 50 гектараў траў. Ужо скасіў 450 гектараў. Зграбае сянажную масу Георгій Фурс. Тэхніка Георгія Сяргеевіча ў надзейных руках. Ён рыхтуе і рамантуе яе сам. Дзякуючы яго беражліваму стаўленню, тэхніка спраўна працуе і не падводзіць у напружаны перыяд асноўных сельскагаспадарчых кампаній. А працуе Георгій Фурс і на нарыхтоўцы кармоў, і на пасяўной, і на жніве.
— Калі без прывычкі, то кіраваць 9-метровымі граблямі вельмі складана, — кажа механізатар. — Я 42 гады працую ў гаспадарцы і ведаю ўсе тонкасці.
На пытанне, якую працу падабаецца выконваць больш, механізатар з усмешкай адказвае:
— Я працы не баюся, душа ляжыць да ўсіх работ у полі. Проста трэба старацца і ўсё атрымаецца.
На падборы валкоў заняты Аляксандр Кляўко. Ён падабраў ужо 1955 тон. Каб зялёны канвеер працаваў без перабояў, арганізавана адвозка: на ёй заняты аўтамашына МАЗ і чатыры трактары. Прычым, возяць «зялёнку» не толькі ў сянажную траншэю, але і на корм жывёле.
Цяпер працоўны дзень пачынаецца ў 7 гадзін. Перад яго пачаткам — абавязковае бягучае тэхабслугоўванне.
Галоўны аграном сельгасарганізацыі Марыя Цымановіч адзначае, што ўраджайнасць траў зараз складае 120 цэнтнераў з гектара, што значна больш, чым летась. Каб атрымаць такі ўраджай, пастараліся выканаць увесь комплекс неабходных мера-прыемстваў: своечасова пасеялі, рана вясной падкармілі. Зараз важна, каб і надалей была ўмераная тэмпература паветра і дастатковая колькасць ападкаў. Тады ёсць надзея на добры другі ўкос. Да таго ж, пасля першага ўкоса шматгадовую траву падкармліваюць азотнымі ўдабрэннямі, як таго і патрабуе тэхналогія. Паспеюць яшчэ 300 гектараў аднагадовай травы, якія будуць убіраць другім укосам.
У сельгасарганізацыі пастараліся стварыць усе ўмовы для плённай работы на нарыхтоўцы кармоў. Тут разумеюць, што зараз вельмі адказны час, які нельга ўпусціць. Нарыхтуюць якасныя кармы зараз — будуць прыбаўленні ў вазе і надоі зімой. Таму ўсе стараюцца, бо агульны вынік залежыць ад сумленнай працы кожнага.
Анастасія ПЛЯТНЁВА