Ёсць рэкорд! Хлебаробы раёна сабралі добры ўраджай
Сёлета хлебаробы раёна сабралі небывала высокі ўраджай. Ужо намалочана больш за 113 тысяч тон збожжа — гэта рэкорд для нашага раёна. Сярэдняя ўраджайнасць перавысіла 35 цэнтнераў з гектара. Наш раён уваходзіць у пяцёрку лідараў па агульным намалоце ў Мінскай вобласці. У мінулым годзе, для параўнання, намалочана 99 тысяч тон, у 2018-м — 86 тысяч тон. Дагэтуль рэкордным быў 2014 год, калі ў раёне было намалочана 104 тысячы тон збожжа.
У раёне ўбрана 98 працэнтаў плошчы. Цалкам завяршыць уборку збожжавых культур некаторым гаспадаркам не дазваляюць дажджы. Спадзяёмся, што надвор’е ў бліжэйшыя дні паспрыяе хлебаробам, і агульны каравай Пухавіччыны стане яшчэ больш важкім.
