Запрашаем пухавіччан зрабіць падарожжа ў эпоху Савецкага Саюза
Супрацоўнікі раённага краязнаўчага музея запрашаюць жыхароў горада і раёна зрабіць падарожжа ў даволі супярэчлівы час — эпоху Савецкага Саюза. У карціннай галерэі яны арганізавалі выставу “Назад, у СССР”. Для некага гэта будзе вяртанне ў маладосць, а для некага — больш падрабязнае знаёмства з эпохай, у якой нарадзіліся і сталелі іх бацькі.
Адкрыццё выставы было прымеркавана да акцыі “Ноч музеяў”. Удзельнікам гэтага мерапрыемства прапанавалі пазнаёміцца з экспанатамі, сярод якіх прадметы, звязаныя з савецкай ідэялогіяй, побытам людзей таго часу, і правесці свае паралелі. Напрыклад, на выставе размешчаны некалькі знамёнаў, якія ўручаліся пераможцам сацыялістычнага спаборніцтва. Яно ў савецкія часы абавязкова арганізоўвалася і паміж прадпрыемствамі, і паміж іх работнікамі. Адзначым, што традыцыя такім чынам вылучаць лепшых захавалася і да нашых дзён.
На адной з вітрын прадстаўлены савецкія грошы. Як у той час гэта былі рублі і капейкі, так і зараз: назву грошы не змянілі. А вось пакупніцкая здольнасць іх значна адрозніваецца. Думаю, шмат хто памятае, што ў Савецкім Саюзе былі тавары, якія каштавалі адну капейку: спічкі, стакан газаванай вады без сіропу. У наш час за такі кошт нічога не купіш. І гэта адно са сведчанняў таго, што пакупніцкая здольнасць сучасных грошай ніжэйшая, чым была ў савецкіх. Затое нашы сучаснікі на свае сённяшнія даходы здольныя атрымаць значна больш тавараў і паслуг, чым “савецкія” продкі.
Цікавасць у ўдзельнікаў мерапрыемства вызвала віктарына, якую для іх падрыхтавалі супрацоўнікі музея. Усе разам успомнілі пра тое, што патаеннай марай кожнага савецкага чалавека было набыццё кватэры, машыны, дачы. І пра тое, што чацвер ва ўсёй краіне быў рыбным днём. І што ўсё гэта стала гісторыяй ў 1991 годзе, калі перастаў існаваць Савецкі Саюз.
У кожнага з нас ёсць сваё мінулае. Яно рознае: светлае і не вельмі. Так і савецкі перыяд гісторыі Беларусі для некага напоўнена складанымі праблемамі, а для некага — успамінамі аб маладосці, асаблівасць якой — уменне радавацца кожнаму дню не гледзячы ні на якія праблемы…
Наталля ПАРХОМЧЫК.