Восеньскія клопаты аб вясне
Узняцце зябліва і вываз арганікі на палі — галоўная справа, якой заняты земляробы ў гэтыя восеньскія дні. Вядома, тэрмін і якасць палявых работ з’яўляюцца трывалым падмуркам будучага ўраджаю.
На палетках ААТ “Шацк” зябліва ўзнімаюць механізатар Дзяніс Дубовік на МТЗ-1221, а таксама Сцяпан і Уладзімір Саладухі на энерганасычаным трактары МТЗ-3022. Браты працуюць у адным экіпажы ў дзве змены.
— З пастаўленай задачай яны добра спраўляюцца. У сярэднім у дзень могуць узараць да 50 гектараў, — расказвае галоўны аграном Леанід Алізар. — З запланаваных 900 гектараў ужо ўзнята амаль 500 гектараў зябліва. Да 25 кастрычніка гэты від работ плануем цалкам завяршыць. Спадзяёмся, што і надвор’е, і тэхніка не ўнясуць карэктывы ў нашы планы.
Работы вядуцца пад кантролем спецыялістаў, якія сочаць за разроўненасцю поля, глыбінёй ворыва, задзелкай раслінных рэшткаў. Вясной па палетках пройдзе культыватар, затым земляробы ўнясуць удабрэнні, і можна будзе сеяць яравыя культуры.
У панядзелак у гаспадарцы пачалі вывозіць арганіку з малочнатаварных ферм на палеткі. Задача на бліжэйшы час — вывезці 5000 тон арганічных угнаенняў.
— Мы стварылі звяно з вопытных механізатараў. На пагрузчыку “Амкадор ТО-352” працуе Мікалай Працкевіч. Аляксандр Міхалковіч, Сяргей Рак і Віктар Еўдакіменка задзейнічаны на адвозцы. Работу арганізавалі такім чынам, што вываз арганікі вядзецца без затрымак, — працягвае Леанід Алізар. — Удзень на палі вывозіцца ў сярэднім 500 тон угнаенняў. Да канца кастрычніка плануем справіцца з пастаўленай задачай.
Вядома, зіма прыпыніць работу тэхнікі на палях, а пакуль да-зваляе надвор’е, механізатары працуюць на поўную сілу.
