З любоў’ю да прыгожага
Міма дома № 24 па вуліцы Савецкая ў вёсцы Вецярэвічы-2 праехаць проста так немагчыма. Так і хочацца спыніцца і атрымаць асалоду ад прыгажосці, якую стварылі гаспадары. Дом літаральна патанае ў кветках. А розныя малыя архітэктурныя формы, у выглядзе птушак і жывёл, дапамагаюць стварыць казачную атмасферу. Арыгінальныя ідэі па добраўпарадкаванні Валянціна Кляшчонак і яе муж Валерый бяруць, у асноўным, з часопісаў. Жанчына кажа, што любіць, каб вакол было прыгожа і ўтульна.
— Вось гэты веласіпедыст робіцца вельмі проста, — паказвае Валянціна Уладзіміраўна на драўлянага чалавечка ў садочку. — Пара бярозавых пален, шлем і акуляры — вось і ўсё.
Архітэктурных форм на ўчастку шмат: лебедзі каля невялічкага фантана, вясёлыя свінні з пластыкавых бутэлек, папугай з кола. А драўляныя зебра і конь служаць яшчэ і для вырошчвання кветак. Пад гаршчочкі для кветак гаспадары прыстасавалі старыя каструлі, якія пафарбавалі ў жоўты колер і намалявалі на іх вясёлыя смайлікі. Дарэчы, развітвацца са старымі рэчамі гаспадары не спяшаюцца. Валянціна Уладзіміраўна і Валерый Уладзіміравіч стараюцца ўсяму знайсці выкарыстанне. Так, з пластыкавых бутэлек гаспадар зрабіў букет кветак і шышкі, якія стаяць на плоце. Яшчэ адна славутасць у двары дома № 24 — млын. Здаецца, што ён нібы казачны: намаляваныя акенцы, крылы, якія рухаюцца ад парыву ветру. Але млын — гэта не толькі дэкаратыўны элемент, гэта яшчэ і летні душ.
Гаспадыня расказала, што дзецям і ўнукам, якія прыязджаюць у госці, вельмі падабаецца адпачываць у вёсцы. Дарэчы, для 12 унукаў і ўнучак тут ёсць вялікія арэлі.
— Задумак па добраўпарадкаванні ў нас шмат. У наступным годзе хочам зрабіць новы плот з невялічкіх дошчачак, — паказала мне часопіс з малюнкам гаспадыня. — Работа, можна сказаць, ювелірная, трэба шмат вольнага часу, таму пачнем нарыхтоўваць матэрыял зімою, каб летам ужо было прыгожа.
Што датычыцца кветніка, то колькасць відаў кветак падлічыць практычна немагчыма: тут петуніі, ружы, аксаміткі, гладыёлусы, цюльпаны, а сальвіі — аж пяць сартоў! Незвычайна прыгожым выглядае куток дома, які абвівае дзявочы вінаград. Валянціна Уладзіміраўна кажа, што восенню лісце змяняе колер, і сцяна здаецца жывой загараддзю. Куды ні глянь відаць, што жанчына клапоціцца пра кожную расліну. Беражлівыя адносіны да прыроды склаліся нездарма — гаспадыня па прафесіі аграном. У ААТ “Вецярэвічы” яна працавала з 1975 па 2012 год.
— Калі я працавала, у мяне не было ніякіх кветнікаў: праца, гаспадарка, дзеці — вольнага часу амаль не было, — прызналася Валянціна Уладзіміраўна. — А калі выйшла на пенсію з’явілася больш часу. Муж ва ўсім дапамагае, у яго залатыя рукі. З мяне ідэя, а ён — увасабляе яе ў жыццё. Дарэчы, у планах Валерыя Уладзіміравіча пабудаваць сваю лазню.
У сям’і не толькі прыгожая добраўпарадкаваная тэрыторыя, але і вялікая гаспадарка: бройлерныя кураняты, куры, свінні, каты, сабака. Вялікі агарод. Таму нават вольнай хвілінкі, асабліва цёплымі днямі, у гаспадароў няма, бо трэба ўсё даглядзець. Але ж такі рэжым для іх толькі ў радасць. Калі ствараеш прыгажосць — і на душы становіцца цяплей. У гэтым ўпэўнена Валянціна Уладзіміраўна.
