Тэатр Мар’інагорскай СШ №2 “Залаты ключык” прэзентуе новы спектакль
Такое вось надзённае пытанне вырашалі, жартуючы, акцёры ўзорнага тэатра Мар’інагорскай СШ №2 “Залаты ключык” падчас прэм’ерных паказаў новага спектакля “Пра Ямелю, Цара і ўсіх, усіх, усіх”.
Сцэнарый для спектакля напісаны паводле вядомай гумарыстычнай казкі Леаніда Філатава «Про Федота-стрельца, удалого молодца». Сюжэт, можа, і не зусім дзіцячы, аднак добра зразумелы і гэтай аўдыторыі. Тым больш, што некаторыя героі ўзяты з такіх знаёмых казак! Ну, хто, напрыклад, Ямелю не ведае? Юныя тэатралы ўпэўнена адчувалі сябе на сцэне роднай школы, таму прэм’ера прайшла з поспехам. Казку паглядзелі амаль усе вучні школы. Некаторыя прызналіся, што пабывалі на прадстаўленні двойчы. І, трэба ад-значыць, знайшлі розніцу.
— Гэта зразумела ўжо таму, што спектакль іграюць два саставы акцёраў, — гавораць кіраўнікі тэатра Ларыса Родак і Ірына Макарава. — На гэты раз, дарэчы, у нас нямала дэбютантаў. Ямелю, напрыклад, у адным з саставаў іграе дэбютант Міхаіл Кляўко. І нядрэнна спраўляецца з гэтым.
Мяне ўласна вельмі ўразіла якаснае выкананне своёй ролі (ролі Цара) Дзянісам Арышчанка, які так арганічна стварыў вобраз заклапочанага арганізацыяй шлюбу дачкі бацькі, што, здавалася, і без мантыі хлопец будзе паводзіць сябе па-царску. Аднак Цар пасля спектакля выглядаў зусім звычайным школьнікам. Ніколі не пазнала б у ім таго, хто больш чым упэўнена аб’яднаў вакол сябе ўсё дзейства казкі.Апладысменты гледачы адрасавалі Кацярыне Мялешка (Прынцэса), і Уладзе Мартынчык (Пацешка), і Дар’і Лазарчык (сучасная Баба Яга-шапаголік)… І ўсім-усім-усім астатнім. Літаральна як заяўлена ў назве спектакля.
Не магу не адзначыць, што новы спектакль выйшаў у цудоўных дэкарацыях і ўразіў якаснымі касцюмамі, якія па традыціі шыюцца ў тэатры сваімі рукамі. Таму можна з упэўненасцю сказаць, што праца акцёрамі і рэжысёрамі выканана на выдатна, і прэм’ера ў школе адбылася. Цяпер чарга пухаўчан знаёміцца з новай пастаноўкай дзіцячага тэатра.