Вечар развітання з дзяцінствам

Выпускны баль… Гэта як мяжа сталасці для ўчарашніх школьнікаў, чыё жыццё было да гэтага часу напоўнена толькі ўрокамі, перапынкамі, марамі пра заўтрашні дзень. А ён наступіў   так  хутка  ўслед  за  бясхмарным шчаслівым дзяцінствам. І вось 265 выпускнікоў разам з сябрамі, настаўнікамі і бацькамі спяшаюцца на першы дарослы баль і апошні школьны вечар…

— Наперадзе ў вас, выпускнікі, дарослае самастойнае жыццё, напоўненае як радасцю і поспехамі, так і цяжкасцямі, — звярнуўся да юных пухаўчан, адкрываючы раённы выпускны баль, старшыня раённага выканаўчага камітэта Сяргей Ленкавец. — Але не трэба баяцца праблем і няўдач. Трэба заўсёды верыць ў свае сілы і ісці наперад, імкнучыся  з  кожным  днём  станавіцца больш прафесійнымі, лепшымі, больш паспяховымі. Жадаю вам усім пры гэтым ніколі не забываць свае вытокі, сваіх настаўнікаў, якія заклалі  тую аснову, што стане падмуркам будучыні.

Вадзіму Фяськову залаты медаль уручае старшыня райвыканкама Сяргей Ленкавец

Сяргей Ленкавец па традыцыі ўручыў  семярым  выпускнікам, якія  атрымалі атэстаты асобага ўзору, галоўныя вучнёўскія ўзнагароды — залатыя медалі. У гэтым годзе іх атрымалі выпускнікі Мар’інагорскай гімназіі  Аліна Бакуновіч, Вадзім Фяськоў, Кацярына Груша, выпускнікі СШ №3 горада  Мар’іна Горка Марыя Зыранава і Яўген  Кучараў,  выпускнік СШ №2 горада Мар’іна Горка Яўген Мазанік.

Яўген Мазанік, дарэчы, выпускнік унікальны. Малады чалавек з першага класа вучыўся толькі на выдатна. Іншых адзнак ён проста не ведае.  І  выпускныя  экзамены ўчарашні адзінаццацікласнік здаў  на «дзясяткі». У далейшым  Яўген марыць звязаць сваё жыццё з тэхнічнымі спецыяльнасцямі. Але ў запасе ёсць унікальны шанец стаць без экзаменаў студэнтам Дзяржаўнага педагагічнага ўніверсітэта імя Максіма Танка: таленавіты выпускнік ужо сёння мае гарантыйны ліст рэктара ўніверсітэта аб пазаконкурсным залічэнні ў навучальную ўстанову.

Яўген Мазанік

Выпускнікоў-2016 на выпускным балі віталі таксама начальнік аддзела адукацыі райвыканкама Валянціна Андрэева, старшыня  грамадскага  аб’яднання  «Белая Русь» Таццяна Лабанава і першы сакратар раённага камітэта  ГА  «БРСМ»  Таццяна  Красікава. Яны ўручылі  граматы і падарункі лепшым вучням, пераможцам алімпіяд і конкурсаў, лепшым спартсменам і актывістам. Узнагароды атрымалі Алена Паутава, Крысціна Прус, Андрэй  Зубарык,  Андрэй  Санковіч, Алеся  Прановіч,  Артур Лебедзь і іншыя выпускнікі школ нашага раёна.Добрым падарункам для выпускнікоў стаў святочны канцэрт, пасля завяршэння якога яны былі гатовы выпусціць у  неба  рознакаляровыя  шары. Але непрадказальны чэрвеньскі дождж некалькі змяніў планы. Зрэшты, усяго на некалькі хвілін. І гэта наўрад ці моцна сапсавала маладым пухаўчанам настрой: дождж — усяго толькі маленькая непрыемнасць, часовая перашкода. Зусім як у жыцці: трэба толькі пачакаць, і зноў стане сонечна…

Алена ШАНТЫКА