На палетках гаспадарыць «Раса»
Каманда механізатараў з ААТ “Голацк”, як і астатнія земляробы раёна, у пачатку тыдня вымушана была чакаць, пакуль глеба крыху падсохне. Не атрымлівалася выехаць на палі з агрэгатамі.
— Думаю, літаральна дзень-два, і будзем пачынаць сяўбу, — расказвае інжынер-механік Аляксандр Славікоўскі, які суправаджаў мяне ў поле. — Пакуль на палетках працуе комплекс агратэхнічных сродкаў “Раса”, які, дзякуючы асаблівасцям эластычных колаў, аказвае нізкі ціск на глебу і можа праехаць па вільготным участкам.
На “Расе” Аляксандр Расолька веў падкормку азімага трыцікале вадкім азотам. Удабрэнні яму падвозілі Сяргей Гасюк і Дзмітрый Хазянін. Падкормку Аляксандр Генадзьевіч пачаў напрыканцы мінулага тыдня. На рахунку механізатара ўжо больш за 450 гектараў.
Гэты комплекс Аляксандр Расолька атрымаў у 2011 годзе і з тых часоў — нязменны яго гаспадар. Таксама за Аляксандрам Генадзьевічам замацаваны трактар і камбайн. Пазней механізатар будзе праводзіць хімпраполку гэтых пасеваў, а летам — убіраць ураджай.
План сяўбы ў гаспадарцы даўно вядомы. Голацкім земляробам трэба пасеяць 150 гектараў яравой пшаніцы, 680 гектараў ячменя, 70 гектараў аўса і 150 гектараў зернебабовых. Уся тэхніка, якая будзе задзейнічана на пасяўной, ужо падрыхтавана.
Напярэдадні палявога сезона ў сельгасарганізацыі аднавілі машынна-трактарны парк. На новым агрэгаце для падрыхтоўкі глебы будзе працаваць Аляксандр Лях, на новым МАЗе 5551 — Сяргей Стулянкоў, на трактары МТЗ-3522 — Віталь Гараўскі. Пазней, у сезон корманарыхтоўкі, на палеткі выедзе новы КВК-800. Гэтым кормаўборачным камбайнам будзе кіраваць Алег Маркаў.
Кацярына ДАБРЫЦКАЯ.