Завяршыўся Рэспубліканскі форум студэнцкіх атрадаў «Маладосць. Праца. Адзінства», прысвечаны Дню народнага адзінства
«Напярэдадні самага маладога дзяржаўнага свята краіны ў Мінску сустрэліся больш за 700 удзельнікаў працоўнага руху з усіх рэгіёнаў Беларусі. Маладзёжная каманда для ўдзелу ў форуме была сфарміравана на конкурснай аснове. У сталіцу прыехалі лепшыя маладыя людзі, якія праявілі сябе падчас працы атрадаў у раёнах», — расказаў другі сакратар Цэнтральнага камітэта Беларускага рэспубліканскага саюза моладзі Аляксандр Прохараў.
Па словах другога сакратара ЦК БРСМ, праграма форуму была насычана мерапрыемствамі і інтэрактывамі. Удзельнікі форуму пазнаёміліся са спецыфікай работы Парка высокіх тэхналогій, а таксама прадпрыемстваў Мінска і вобласці, такіх як «Атлант», БелАЗ, МАЗ, Мінскі завод колавых цягачоў, Мінскі трактарны завод, «БелДжы» і іншых.
Традыцыйна ў праграму форуму быў уключаны патрыятычны блок. Удзельнікі форуму ўсклалі кветкі да памятнага знака ў гонар вызваліцеляў Беларусі, да стэлы «Мінск — горад-герой», высадзілі ў парку Перамогі на месцы закладкі яблыневага саду ў гонар 100-годдзя камсамола 17 маладых яблынь, якія ўвасабляюць мір, яднанне і сяброўства.
Удзельнікі рэспубліканскага форуму студэнцкіх атрадаў «Маладосць. Праца. Адзінства» Беларускага рэспубліканскага саюза моладзі прынялі заяву аб недапушчальнасці санкцый з боку краін Захаду і ЗША да прадпрыемстваў, на якіх працуе і моладзь Рэспублікі Беларусь.
Адным з цэнтральных мерапрыемстваў форуму «Маладосць. Праца. Адзінства» быў аднайменны рэспубліканскі марафон студэнцкіх атрадаў. Юнакам і дзяўчатам прапаноўвалася здзейсніць своеасаблівае падарожжа па нашай краіне, пазнаёміцца з дзейнасцю атрадаў розных профіляў, разам праспяваць любімыя песні. Марафон працягне свой шлях па рэгіёнах Беларусі. Гэта будзе сапраўднае свята студэнцкіх атрадаў з падвядзеннем вынікаў трэцяга працоўнага семестра і ўшанаваннем лепшых удзельнікаў руху.
Студатрадаўскі рух — адзін з вядучых напрамкаў дзейнасці Беларускага рэспубліканскага саюза моладзі. У гэтым годзе Рэспубліканскі штаб студэнцкіх атрадаў рэалізаваў пяць рэспубліканскіх і міжнародных працоўных праектаў. У складзе студэнцкіх атрадаў працаўладкаваны больш за 26 тысяч юнакоў і дзяўчат.
Па матэрыялах БелТА.