Было весела ў Вясёлым-2
Не ўсе ведаюць, што на тэрыторыі Дукорскага сельскага Савета ёсць адразу дзве вёскі Вясёлае. Каб іх не блытаць, дабавілі да назвы адной з іх лічбу “2”. Дарэчы, Вясёлае-2 стала трэцім найменнем гэтага населенага пункта. Спачатку гэта былі Прытыкі, бо “прытыкаліся” да Дрычына. Потым, згодна мясцоваму паданню, засяліліся туды маладыя і бойкія людзі, і назва змянілася — стаў населены пункт Вясёлым. Ну, а калі прайшло ўзбуйненне сельсаветаў, прыйшлося яшчэ раз змяніць шыльды.Па гістарычных мерках вёску старажытнай не назавеш — ёй толькі споўнілася 90 гадоў (упершыню населены пункт успамінаецца ў 1926 годзе). Гэтую падзею і адзначылі жыхары Вясёлага-2 ў апошнія выхадныя лета.
Сцэнарый свята падрыхтавала бібліятэкар Дрычынскай бібліятэкі Жана Халюта, якая збірае і зберагае звесткі аб гісторыі гэтага населенага пункта.
Вёска маладая, а старажылаў у ёй нямала. І самая старэйшая з іх — Ганна Кладава — равесніца вёскі. Такія супадзенні сапраўды выключныя. Таму і віншавалі Ганну Паўлаўну аднавяскоўцы шчыра. Не забы-ліся і пра тых, каму споўнілася 80, 70, 60 гадоў — усе паважаныя людзі атрымалі падарункі ад Дукорскага сельсавета, якія ўручыла яго старшыня Таццяна Савік. Назвалі і самую маленькую жыхарку: ёй стала Ульяна Осіпчык, якой якраз ў жніўні споўніўся годзік. Дарэчы, мясцовыя жыхары ганарацца тым, што ў іх ёсць два першакласнікі, і старэйшына Іна Журык падрыхтавала для іх падарункі. Жыве вёска, калі ў ёй нараджаюцца дзеткі і ёсць моцныя сем’і. Аднавяскоўцы ўшаноўвалі сярэбраных юбіляраў — сям’ю Урадзімскіх і мнагадзетную сям’ю Осіпчык.
Паважаюць ў вёсцы сваіх ветэранаў працы. Іх імёны таксама прагучалі на свяце. А старшыня прафсаюзнага ка-мітэта СПФ “Дрычын” КУП “Гармалзавод №1” Кацярына Сянько ўручыла падарункі тым, хто шмат гадоў працаваў у гаспадарцы.Зразумела, што гонар вёскі — добрыя гаспадары. Па традыцыі, на свяце адзначылі тых, у каго самае лепшае падвор’е. Першае месца заваявала ся-дзіба Ірыны Дражнік. Здзівіла яна не толькі добраўпарадкаваннем, але і незвычайным ураджаем: на градках паспела больш за сотню сакавітых паўднёвых кавуноў. Другое месца прысудзілі сядзібе Галіны Суханенка, трэцяе — Таццяны Леўчык.
Святочны настрой на свяце стваралі калектывы “Сяброўкі” Дукорскага СДК і “Вярбічанька” Дрычынскага СДК. Гучалі на імправізаванай сцэне і жартоўныя песні, і прыпеўкі. Нямала было і розных конкурсаў. Адным словам, свята атрымалася вельмі яскравым, і ў Вясёлым-2 сапраўды было весела.